Siglir tar il cuntegn

Header

cuntegn

CM Oberstdorf Cologna: «I sto simplamain constar tut»

In dals gronds trumfs svizzers als campiunadis mundials da ski nordic ad Oberstdorf è sco adina ils davos passa 10 onns, Dario Cologna. Il Jauer na tutga dentant betg pli tranter ils gronds favurits. Sche tut constat è dentant bler pussibel.

video
La discussiun cun Dario Cologna ad Oberstdorf
Or da RTR Social dals 26.02.2021.
laschar ir

Dario Cologna sa participescha gia a ses 7avels campiunadis mundials. Fin oz ha el gudagnà trais medaglias, ina dad aur e duas d’argient. Ad Oberstdorf emprova Cologna da procurar per in exploit en las cursas da distanza ed uschia turnar a chasa cun ina quarta medaglia.

audio
Dario Cologna en vista a ses 7avels campiunadis mundials
03:12 min, Actualitad dals 26.02.2021.
laschar ir. Durada: 03:12 minutas.

3 cursas – 3 schanzas

Il Jauer survegn pliras schanzas. La sonda (27-2) parta el al skiatlon sur 30 kilometers, vul dir 15 kilometers classic e 15 kilometers skating. Quatter dis pli tard stat sin il program la cursa singula da 15 kilometers. En questa disciplina è Cologna daventà gist trais giadas en seria campiun olimpic. Al davos di dals campiunadis mundials spetga lura anc la cursa roiala sur 50 kilometers classic.

Stagiun modesta fin ussa

Dario Cologna sa: «Tut sto constar. La furma dal di, il material, il cletg – simplamain tut.» Quai n’è betg savens capità en questa stagiun. Il sulet top resultat e punct culminant dals davos mais è il segund plaz en la cursa da 15 kilometers dal Tour de Ski en sia patria, la Val Müstair. Dario Cologna ha dentant gia baud mess il focus sin ils campiunadis mundials, la finamira principala da questa stagiun 2020/2021.

video
Dario Cologna avant la stagiun 2020/2021
Or da Telesguard dals 05.11.2020.
laschar ir

La fermezza da Cologna: Esser pront al di x

Dario Cologna auda cun ses 34 onns gia tar la garda veglia che va a la partenza ad Oberstdorf. Ils gronds favurits, che vegnan principal da la Norvegia e da la Russia, èn tuts pli giuvens. Per Cologna pleda dentant sia rutina e sia classa d’adina puspè pudair mussar al di x, lura cura ch’i va per las medaglias, la meglra prestaziun pussaivla. Quai ha il passlungist grischun gia mussà diversas giadas ad eveniments gronds.

RTR Actualitad 17:00

Artitgels legids il pli savens

Scrollar a sanestra Scrollar a dretga