A Val di Sole stattan sin il program sis disciplinas entaifer tschintg dis. Dasper las cursas da cross country vegn er cumbattì per medaglias en la cursa da staffetta, l’uschenumnà Team Relay, e per l’emprima giada en l’istorgia er en il format da short-track. Vitiers vegnan las cursas da downhill, las cursas da four-cross sco era las cursas da e-mtb. I vegn spetgà cursas spectacularas en ina regiun che vala dapi onns sco in Mecca dal mountainbike.
Program da cursas a Val di Sole
Bunas regurdientschas da Val di Sole
Il davos campiunadi mundial a Val di Sole en il Trentino ha gì lieu il 2008. Avant 13 onns era tranter auter Nino Schurter daventà campiun mundial tar ils umens U23. Mathias Flückiger era vegnì terz en questa cursa. Tar ils umens d’elita avevan ils Svizzers schizunt pudì festivar ina traidubla victoria. Christoph Sauser aveva triumfà avant Florian Vogel e Ralph Näf.
Blers trumfs svizzers a la partenza
Ils mountainbikers svizzers partan cun grondas ambiziuns al campiunadi mundial 2021. Cun Mathias Flückiger, il vice-campiun olimpic da Tokyo, po la Svizra schizunt trametter il top-favurit a la partenza da la cursa da cross country. Far revantscha en il Trentino vul principal Nino Schurter suenter ch’el ha stuì sa cuntentar als gieus olimpics a Tokyo cun il quart plaz. A Val di Sole ha Schurter gia gudagnà quatter giadas la cursa d’elita da la cuppa mundiala. En ina buna furma sa preschenta il mument er Lars Forster, il collega d’equipa da Nino Schurter. Avant bun in’emna è Forster daventà per la segunda giada en sia carriera campiun d’Europa a Novi Sad en la Serbia. Cun ambiziuns parta er il Tessinais Filippo Colombo.
Nominaziun da Swiss Cycling
Tar las dunnas èn tranter auter a la partenza Jolanda Neff, Sina Frei e Linda Indegand, quai trio ch’ha gudagnà tuttas trais medaglias olimpicas da Tokyo ed uschia procurà per in mument istoric. Las grondas rivalas per las Svizras vegnan puspè ad esser las Franzosas cun la defensura dal titel, Pauline Ferrand-Prévot, e la dominatura da la stagiun en las cursas da la cuppa mundiala, la giuvna Loana Lecomte.
44 atletas ed atlets da Swiss Cycling
Tut en tut van a la partenza a Val di Sole 35 atletas ed atlets svizzers en las disciplinas da cross country e 9 en las cursas da downhill. Tranter quels figureschan tschintg grischuns sin la glista da partenza. Dasper Nino Schurter che parta a la cursa dals umens d’elita vul Janis Baumann dad Igis far furora en la cursa dals U23. Vital Albin da Tersnaus è nominà sco atlet da reserva, el dastga però ir a la partenza a la cursa dad e-mtb. Tar las junioras sut 19 onns dat Lorena Cadalbert da Cuira ses debut ad in campiunadi mundial. Ed al davos di emprova anc Basil Weber da Laax da gudagnar ina medaglia en la cursa da downhill.
Il duo Van der Poel e Pidcock manca
Dus dals gronds favurits mancan a quest campiunadi mundial da mountainbike a Val di Sole, per l’ina l’Ollandais Mathieu van der Poel e per l’autra il Brit Tom Pidcock. Van der Poel ha dà forfait pervia da problems cun il dies. El era cupitgà grevamain en la cursa olimpica a Tokyo ed era stuì dar si la pli impurtanta cursa da la stagiun. Enstagl da sa participar al campiunadi mundial da mountainbike sa concentrescha Mathieu van der Poel sin il Tour da Benelux ch’ha lieu dals 30 d’avust fin ils 5 da settember. Questa cursa aveva el gudagnà l’onn passà. La gronda finamira dal talent ollandais da 26 onns ch’ha purtà quest onn durant sis etappas il maillot jaune al Tour de France è dentant il classicher da via Paris – Roubaix ils 3 d’october. Tom Pidcock, campiun olimpic a Tokyo, è actualmain cun ses Team Ineos Grenadiers a la Vuelta, il Tour da la Spagna che cuzza anc fin ils 5 da settember.