I fiss stà la top partida en la 17avla runda: il gieu tranter il HC Tavau ch'è sin plazza trais ed il campiun svizzer EV Zug, ch'è actualmein sin plazza quatter. Pervia da plirs cas da corona en l'equipa da Zug sto il gieu dentant vegnir spustà, quai sin ils 16 da november.
Cas suenter il gieu da Champions Hockey League
Suenter che Zug ha giugà l'emna passada cunter Red Bull Minca avevan quels constatà plirs cas positivs en lur retschas, scriva Swiss Ice Hockey. Malgrà che l'entira equipa da Zug saja vaccinada hajan dus giugaders silsuenter gì levs sintoms. Ils tests sajan lura stads positivs, quai er anc tar ulteriuras persunas dal team.
Ils resultats da las ulteriuras partidas da la 17avla runda:
- Ambri ha gudagnà cunter Losanna cun 3 a 2
- Fribourg ha gudagnà cunter Berna cun 5 a 3
- Ils Lakers han pers la partida cunter Lugano cun 1 a 3
- Ils ZSC Lions han gudagnà cunter Genevra cun 7 a 5
