Siglir tar il cuntegn

Header

cuntegn

Cortina d'Ampezzo Surpraisa a Cortina: Mowinckel gudogna avant Wiles e Goggia

La Norvegiaisa Ragnhild Mowinckel gudogna la segunda cursa rapida a Cortina d'Ampezzo. Cun il nummer 20 ha ella anc pudì stuschar enavos la Taliana Sofia Goggia che maina il classament da la cursa rapida – e quai per 44 tschientavels. Per Mowinckel è quai l'emprima victoria en ina cursa rapida. E cun il nummer 26 ha l'Americana Jacqueline Wiles lu era anc spustà Goggia dal plaz dus. Per l'Americana è quai il meglier resultat en – en la cuppa mundiala era fin ussa il terz rang il meglier, ed era quel aveva ella cuntanschì a Cortina.

Il podest

  • 1. Ragnhild Mowinckel 1:33,50
  • 2. Jacqueline Wiles +0,35
  • 3. Sofia Goggia (ITA) +0,44

La consequenza è però era stada ch'i han stuschà Lara Gut-Behrami dal podest. Gut-Behrami n'ha uschia betg pudì tegnair il resultat da l'emprima cursa rapida a Cortina d'Ampezzo - ier sco segunda. La sonda hai la finala anc tanschì per plaz 5 - cun il medem temp e rang sco l'Austriaca Stephanie Venier, ch'aveva il venderdi anc gudagnà la cursa rapida.

Las Svizras

  • 5. Lara Gut-Behrami +0,71
  • 11. Jasmine Flury +0,99
  • 15. Priska Nufer +1,28
  • 21. Delia Durrer +1,75
  • 27. Jasmina Suter +2,27
  • 28. Stephanie Jenal +2,34

Senza Suter e Gisin

Per Corinne Suter è la stagiun a fin suenter la cupitgada en la cursa rapida da venderdi. Ella haja stgarpà in liom cruschà, sco quai che Swiss Ski communitgescha. Era Michelle Gisin n'è betg partida la sonda suenter la cupitgada. Uschia na partan ellas era betg en il super-g da la dumengia. Betg anc cler è, sche Joana Hählen parta en il super-g, perquai ch'ella è actualmain en tractament medicinal.

RTR novitads 12:00

Artitgels legids il pli savens