Ils Svizzers n'han per ina giada betg cuntantschì ils plazs davantvart en la cursa da Cross Country da la cuppa mundiala a Snwoshoe en ils Stadis Unids. Meglier Svizzer è Filippo Colombo sco 5avel. Pervi d’ina blessura suenter sia cupitgada en la cursa da Short Track ha Nino Schurter stuì dar forfait ed er Mathias Flückiger n'è betg stà da la partida. Gudagnà la cursa da Cross Country ha il Spagnol David Valero Serrano. I sa tracta da sia emprima victoria en la cuppa mundiala.
Nino Schurter è cupitgà
L'actual campiun mundial Nino Schurter è cupitgà en la cursa da Short Track da la cuppa mundiala a Snowshoe en ils Stadis Unids. Sin posiziun trais è Schurter crudà cun ir sur ina punt da lain. Tenor emprimas infurmaziuns è il mountainbiker grischun sa blessà vid ina spatla. Sco el ha communitgà via Instagram saja nagut rut ed el saja «ok».
Gudagnà la cursa ha l'American Christopher Blevins. Meglier Svizzer è stà il Tessinais Filippo Colombo sco 8avel. Betg stads a la partenza n’èn tranter auter Vital Albin e Mathias Flückiger.
Svizras dasper il podest
Tar las dunnas han Alessandra Keller e Jolanda Neff manchentà be per pauc in plaz da podest en il short track. Keller è vegnida quarta e Neff 5avla. Gudagnà, quai per l'emprima giada insumma, ha l'Americana Gwendalyn Gibson.
Damaun èn sin il program las cursas roialas da Cross Country. Sche Nino Schurter, che maina il mument il classament general, po ir a la partenza, n'è anc betg cler.
