Il Svizzer Henri Laaksonen ha pers cunter il favurit da la Russia Daniil Medwedew cun 1:6, 4:6 e 6:7 (3:7). Suenter in'entschatta d'emblidar ha Laaksonen bain fatg ina adina meglra figura. Medwedew ha dentant pli u main adina gì sut controlla la partida, er perquai ch'el ha strusch gì in problem da mintgamai realisar ses service.
Uschia èsi en absenza dals blessads Roger Federer e Stan Wawrinka per l'emprima giada en quest tschientaner il cas, che nagin giugader Svizzer na stat en la segunda runda dal Australian Open.
Golubic resta al Australian Open senza victoria
Viktorija Golubic ch'è il numer 40 dal mund – perda cunter la Chinaisa Zhang Shuai ch'è plazzada 34 rangs pli enavos, cleramain cun 3:6 e 4:6. A la Turitgaisa da 29 onns n'èsi insumma betg gartegià da vegnir cun buns returns en la partida. Sulet ina giada, al 2:2 en il segund set – ha Golubic pudì prender giu il service da la Chinaisa. Il numer 3 da la Svizra ha uss cun sis participaziuns al Australian Open, anc adina mai gudagnà ina partida.
Per Stefanie Vögele è il turnier a Melbourne era gia a fin suenter l’emprima runda. La qualificanta svizra ha pers cunter la Russa Daria Kassatkina cun 3:6 ed 1:6. Il ferm vent che ha buffà durant la partida ha Vögele cunzunt gì problems tar ses service. Ed en tut ha la Svizra da 31 onns gudagnà sulet 40 pertschient dals puncts tar l'agen service, e sulet dus dad otg games. En la rangaziun vegn ella per l'emprima giada dapi quatter onns a dar or da las meglras 150.
