Jil Teichmann ha gudagnà la partida cunter la Croata Petra Martic cun 6:3 e 6:3. Per la giugadra da Bienna èsi l'emprima giada ch'ella cuntanscha la segunda runda a Melbourne.
Er Belinda Bencic è sa qualifitgada a moda suverana per la segunda runda da l'emprim turnier da Grand Slam da l'onn. A l'Australian Open ha la Svizra gudagnà cunter la Franzosa Kristina Mladenovic en dus sets, cun 6:4 e 6:3. Bencic ch’è il numer 22 dal turnier è stada curt avant Nadal malsauna da Covid-19, cun relativ ferms sintoms. Ella na saja betg anc dal tut tar 100 pertschient, ha l’atleta concedì avant ch’il turnier ha cumenzà.
Proxims duells
En la proxima runda frunta Belinda Bencic sin l'Americana Amanda Anisimova. Il sulet duel cunter Anisimova avant passa dus onns aveva Bencic gudagnà. Jil Teichmann gioga la proxima partida cunter la Belarussa ed anteriura numer 1 dal mund Viktoria Asarenka.
