Bencic sa chatta per il mument ad Abu Dhabi ed è vegnida testada là positiv sin il virus. Sco ils ultims dis er Rafael Nadal. Sin Twitter ha Bencic declerà ch'ella saja uss en isolaziun e ch'ella sentia pulit ferms sintoms, sco fevra, la giugadira che dola ed ella haja snavurs.
Tuttina planisescha la sportista da l'onn da far part a l'Australian Open. Il timing na saja natiralmain betg optimal, dentant veglia ella tuttina sa metter en viadi en questa direcziun, uscheprest che sia perioda d'isolaziun saja vargada ed ella haja la lubientscha.
Gia l'onn passà aveva il coronavirus influenzà a moda massiva sias preparaziuns per il turnier da grand-slam. Là n'aveva ella betg survegnì corona, ma ella ha gì da star 14 dis en quarantina, senza la pussaivladad d'exercitar. Sin ses sgol eran numnadamain auters passagiers vegnids testads positiv sin il virus. Er uss vegn il temp stgars per anc dumagnar nà la furma optimala. L'Australian Open cumenza ils 17 da schaner.
