Il mars 2029 furman Cuira, Arosa e Lai la tribuna per il segund grond eveniment da sport d'enviern dal mund – ils Special Olympics World Winter Games – ils gieus olimpics per persunas cun impediments spiertals. Radund 2'500 atletas ed atlets da passa 100 pajais da l'entir mund sa mesiran en 10 disciplinas. Quai bain per mussar prestaziuns sportivas maximalas, però era per metter in ferm signal per inclusiun e participaziun sociala.
Quels dis è il contract definitiv vegnì suttascrit uffizialmain dal comité d'organisaziun e Special Olympics. A la ceremonia han fatg part il president da Special Olympics Timothy Shriver – in nev da l'anteriur president american John F. Kennedy – e per il comité d'organisaziun Bruno Barth.
Lantschà ils pli emprims Special Olympics ha Eunice Shriver, la sora da l'anteriur president american John F. Kennedy. Lezza era gia adina s'engaschada per ils dretgs da persunas cun impediments spiertals, tras sia sora Rosemary ch'aveva in tal impediment.
Ils 20 da fanadur 1968 han ils emprims gieus gì lieu en il Soldier Field Stadion a Chicago.
Cumenzà avevi però gia pli baud. Entras l'engaschi da Eunice Kennedy-Shriver per l'inclusiun ha ella organisà il «Camp Shriver» en sia atgna chasa il 1962. En in temp, nua che persunas cun impediments vegnivan anc isoladas ed exclusas da societad, furmaziun e sport.
Ils gieus vegnan a beneventar atletas ed atlets, trenaders e trenadras, famiglias e voluntaris da l'entir mund, communitgescha il comité d'organisaziun. Ins quinta cun radund 13'000 persunas che fan part mintga di als eveniments. Quai per inscunters sportivs però era per il barat cultural.
Ils Special Olympics Winter Games s'engaschan per la realisaziun da la convenziun da las Naziuns unidas (ONU) per ils dretgs da persunas cun impediments. La finamira è ina societad inclusiva, nua che persunas cun impediments han access egual a sport, furmaziun e sanadad.