Siglir tar il cuntegn

Header

audio
Il franzos Alexis Pinturault gudogna aur – ils svizzer trumpeschan
Or da Actualitad dals 07.02.2023. Maletg: Keystone
laschar ir. Durada: 4 minutas 16 Secundas.
cuntegn

Cumbinaziun alpina umens Alexis Pinturault gudogna aur a chasa

Quasi avant ses isch-chasa encurunescha Alexis Pinturault sia carriera cun il terz titel da campiun mundial, il segund en la cumbinaziun alpina . Il Franzos che manava gia suenter il super-g ha la finala triumfà a Courchevel piz a cup avant ils dus austriacs Marco Schwarz e Raphael Haaser

Podest cumbinaziun alpina:

  1. Alexis Pinturault FRA 1:08:25
  2. Marco Schwarz AUT +0,10 secundas
  3. Raphael Haaser AUT +0,44 secundas

Als davos campiunadis mundials il 2021 a Cortina d’Ampezzo aveva Marco Schwarz anc gudagnà il titel avant Alexis Pinturault, quai per be 4 tschientavels. Uss, dus onns pli tard, po il Franzos far revantscha. Il skiunz rutinà da 31 onns aveva gia gudagnà aur en questa disciplina als campiunadis mundials dal 2019 ad Are en Svezia.

video
Pinturault: «Jau n'avess betg quintà cun aur»
Or da Sport-Clip dals 07.02.2023.
laschar ir. Durada: 2 minutas 22 Secundas.

Er la medaglia da bronz va a l’Austria, numnadamain a Raphael Haaser, il frar da Ricarda Haaser che veva gudagnà bronz en la cumbinaziun alpina da las dunnas.

Trumpada per ils Svizzers

Ina terrada ston ils skiunzs svizzers magunar en lur emprima cursa a Courchevel Méribel. Il grond trumf svizzer ed in dals gronds favurits, Loïc Meillard, ha stuì sa cuntentar cun il 6avel plaz. Per in plaz sin il podest han la finala bunamain otg dieschavels mancà. Pers ina medaglia aveva Meillard dentant gia en il super-g nua ch’el ha pers 1,34 secundas sin Alexis Pinturault.

video
Per Loïc Meillard n'hai betg pli tanschì en il slalom
Or da Sport-Clip dals 07.02.2023.
laschar ir. Durada: 1 minuta.

Ils Svizzers en la cumbinaziun alpina:

  • 6. Loïc Meillard 1,20 secundas
  • Justin Murisier OUT slalom
  • Stefan Rogentin DNS slalom
  • Marco Odermatt DNF super-g
video
Il slalom da Justin Murisier ha cuzzà be paucas secundas
Or da Sport-Clip dals 07.02.2023.
laschar ir. Durada: 42 Secundas.

Il segund svizzer ch’è anc partì en il slalom dal suentermezdi, Justin Murisier, è crudà ora gia tar l’emprima porta. Per Murisier, avant in onn als gieus olimpics a Peking anc quart en questa disciplina, èsi in’ulteriura dira frida suenter ch’el n’è betg vegnì nominà per il super-g da la gievgia. Insumma betg ì a la partenza en il slalom è il Grischun Stefan Rogentin ch’era classà sco 9avel suenter il super-g. E Marco Odermatt ch’ha fatg part a questa cumbinaziun principal per avair in bun trenament per il super-g è crudà ora gia la damaun curt avant l’arrivada.

Actualitad 12:00

Artitgels legids il pli savens