Sin il pli tard dapi quella stagiun è Stefan Rogentin ina ferma pitga en la cuppa mundiala, principalmain en la disciplina super-G nua ch’il skiunz da Lai ha tranter auter fatg surstar cun il segund plaz a Wengen. Suenter ils buns resultats da las davosas duas stagiuns ha el uschia era merità in plaz fix als campiunadis mundials da skis a Courchevel Méribel. La premiera olimpica ha el festivà avant in onn a Peking, uss vegn Rogentin uschia era tar sia premiera a campiunadis mundials.
Stefan Rogentin vul procurar per ina surpraisa
Cun grondas ambiziuns vegn Stefan Rogentin lura ad ir a la partenza en il super-G da la gievgia, sia disciplina da parada. Swiss Ski ha dentant er nominà il skiunz da 28 onns per la cumbinaziun alpina. Là cumplettescha el il quartet svizzer cun Marco Odermatt, Justin Murisier e Loïc Meillard che vala sco grond trumf svizzer en questa emprima cursa dals umens.
Stefan Rogentin è in spezialist da speed, là sa senta el da chasa. Sin ils skis da slalom n'haja el betg trenà bler ils davos onns. Tuttina è el da buna speranza ch’el vegnia era da mussar ina buna cumbinaziun alpina. Pli baud saja quai numnadamain stà sia pli ferma disciplina ed er sia disciplina preferida. Stefan Rogentin è uschia in da quels skiunzs che pudess procurar per ina da las grondas surpraisas en la cumbinaziun dals umens.
L’emprima part da questa cumbinaziun alpina, il super-G, cumenza a las 11:00 uras, il slalom è il suentermezdi a las 14:30 uras.
