La US Schluein Glion gudogna la Cuppa grischuna 2023. En il final a Cuira batta l'USSI ils victurs da l'onn passà e lur gronds rivals en la terza liga en questa stagiun, Valposchiavo Calcio cun 3:1.
Classa sursilvana en l'emprima mesadad
Il final ha gia cumenzà a moda optimala per la USSI. Gia en la segunda minuta sajetta Lars Caduff il 1:0 per l'equipa da la Foppa. L'attatgader vegn da nizzegiar in sbagl en la defensiun puschlavina. Be paucas secundas avant vess Valposchiavo Calcio gì ina gronda schanza dad ir sez en avantatg entras Nicolò Pola. En la 32avla minuta vegn Marino Cavegn da manar ils Sursilvans cun 2:0 en avantatg suenter ina buna cumbinaziun sur Lars Caduff e Serafin Bundi. Cun quest resultat merità en las equipas idas en la pausa.
Segunda mesadad plain cumbat
Curt suenter la pausa, en la 55avla minuta, vegn Mattia Cathieni, il capo-tiragols da Valposchiavo Calcio da scursanir al 1:2 entras in penalti suenter che Aron Büchler ha piglià la balla cun il maun en la zona da puniziun. Curt pli tard, gist en la meglra fasa da Valposchiavo Calcio, reusseschi a Serafin Bundi da sajettar il 3:1, il gol decisiv. Danovamain n'ha la defensiun puschlavina betg persvadì en questa situaziun. Durant la davosa mes'ura n'è Valposchiavo Calcio betg pli vegnì da reagir. Schluein Glion ha controllà il gieu fin la fin ed uschia triumfar per l'emprima giada en la Cuppa grischuna dapi il 2017. Gia avant sis onns avevan ils Sursilvans gudagnà il final encunter Valposchiavo Calcio, lura cun 1:0.
