La dominanza da Tusaun/Cazas en il ballape da las dunnas en il Grischun cuntinuescha. L'equipa gudogna er l'ediziun dal 2023.
En il final batta Tusaun/Cazas Domat cun 5:4 suenter penaltis. Durant las 90 minutas da gieu n'hai dà nagins gols. Da las 12 ediziuns da la Cuppa grischuna ha Tusaun/Cazas cun quai gia gudagnà nov giadas. L'equipa da Domat resta tar in titel ch'ellas han gudagnà il 2021.
Nagins gols e drama tar penaltis
Il final ha cumenzà cun in'emprima mesadad senza grondas schanzas da gols ma cun grand engaschi da omadus equipas. Suenter la pausa han ins lura vis che Tusaun/Cazas giogan en ina liga sur Domat, fitg grondas schanzas n'ha l'equipa dentant betg creà.
Uschia hai dà penaltis. Là vessan ils underdogs da Domat schizunt gì la schanza da gudagnar suenter che Laura Pinto da Tusaun/Cazas n'è betg buna da convertir il 6avel penalti. La chapitania da Domat Nicole Gartmann n'è dentant betg stada buna da batter Monika Feltscher en il gol da Tusaun/Cazas. Il 7avel penalti da Tusaun ha Melina Baumberger lura fatg en maniera suverana entant che Cris Raselli n'ha betg tutgà il gol. Uschia è stada la defensiun dal titel Grischun perfetga.
lls finals da la Cuppa Grischuna da dunnas
