Siglir tar il cuntegn

Header

video
Schurter ed Indergand sin il podest
Or da Sport-Clip dals 07.05.2021.
laschar ir
cuntegn

Cuppa mundiala ad Albstadt Schurter sin il podest en il short track

Nino Schurter è pront per l’emprima cursa da cross country da la cuppa mundiala ad Albstadt en Germania. En il short track, ina cursa sur bun 20 minutas che vegn dapi il 2018 mintgamai manada atras dus dis avant la cursa roiala, è Schurter vegnì terz.

Nino Schurter è adina stà en la gruppa da testa ed ha intginas giadas attatgà ed empruvà da scappar da la concurrenza. La finala èsi dentant stà il favurit en questa disciplina, il giuven talent ollandais Mathieu van der Poel, ch’ha pudì sa distanziar da tuts en la davosa runda. Van der Poel ha triumfà avant il Franzos Victor Koretzky ch’ha gudagnà il sprint final encunter Schurter.

video
Schurter: «Sun fitg cuntent cun il terz plaz»
Or da Sport-Clip dals 07.05.2021.
laschar ir

Cun Mathias Flückiger ha anc in segund svizzer persvadì. Il Bernais è vegnì 5avel davos il Brasilian Henrique Avancini. Cun Lars Forster sco 12avel ha anc in terz svizzer cuntanschì in plaz sut ils top 15 ed è uschia sa mess en ina buna posiziun da partenza per la cursa da cross country da la dumengia.

  • 1. Mathieu van der Poel (NED) 20:39
  • 2. Victor Koretzky (FRA) + 0:02
  • 3. Nino Schurter (SUI) + 0:03
  • 5. Mathias Flückiger (SUI) + 0:10
  • 12. Lars Forster (SUI) + 0:17
audio
Nino Schurter avant la stagiun superlativa
03:24 min, Actualitad dals 08.05.2021.
laschar ir. Durada: 03:24 minutas.

Buna prestaziun da Linda Indergand

Tar las dunnas è la Svizra Linda Indergand vegnida segunda davos la campiunessa mundiala, la Franzosa Pauline Ferrand-Prévot. Indergand è scappadada gia baud da tuttas. Pir en la davosa runda ha ella stuì laschar passar Pauline Ferrand-Prévot. Cumplettà il podest sco terza ha Annie Last da la Gronda Bretagna. Jolanda Neff ha stuì sa cuntentar cun il plaz 13, tschintg posiziuns davos Sina Frei, la segunda meglra svizra en questa cursa da short track ad Albstadt.

  • 1. Pauline Ferrand-Prévot (FRA) 20:37
  • 2. Linda Indergand (SUI) + 0:01
  • 3. Annie Last (GBR) + 0:02
  • 8. Sina Frei (SUI) + 0:10
  • 13. Jolanda Neff (SUI) + 0:22
  • 14. Ramona Forchini (SUI) + 0:26

Las cursas principalas da cross country èn la dumengia, ils 9 da matg. La cursa da las dunnas d'elita è a las 11:20 uras, quella dals umens d'elita a las 14:35 uras.

Novitads 20:00

Artitgels legids il pli savens

Scrollar a sanestra Scrollar a dretga