Siglir tar il cuntegn

Header

video
Vital Albin: «Batter Schurter fiss in siemi»
Or da Telesguard dals 07.05.2021.
laschar ir
cuntegn

Mountainbike I spetga ina stagiun superlativa

Questa fin d’emna cumenza ad Albstadt en Germania la nova stagiun da la cuppa mundiala da mountainbike. Il punct culminant da quest onn suonda la fin da fanadur cun la cursa olimpica a Tokyo. Plinavant vegn cumbattì per medaglias al campiunadi mundial da la fin d'avust en la Val di Sole en l'Italia.

Legenda: Nino Schurter tutga er questa stagiun tar ils gronds favurits. Keystone

Albstadt, bun 60 kilometers en il nord dal Lai da Constanza, è l’emprima da sis staziuns da la cuppa mundial da questa stagiun. Avant in onn aveva questa cursa stuì vegnir stritgada pervia da la pandemia da corona. Mathias Flückiger è uschia il davos ch’ha gudagnà il 2019 la cursa da cross-country en Germania. Avant aveva Nino Schurter triumfà trais giadas en seria. En il chalender da la cuppa mundiala figurescha er Lai che po beneventar ils megliers mountainbikers dal mund la fin d’emna dals 4 e 5 da settember.

video
Nino Schurter avant la stagiun da muontainbike
Or da RTR Social dals 06.05.2021.
laschar ir

Nino Schurter vul in ulteriur record

Cun ses prest 35 onns tutga Nino Schurter tar ils seniors en la scena da mountainbike. Ma anc adina tutga il mountainbiker oriund da Tersnaus tar ils gronds favurits. Ina finamira è da rumper quest onn il record da la legenda franzosa Julien Absalon ch’ha gudagnà tut en tut 33 cursas da la cuppa mundiala. Per vegnir sin 34 mancan a Schurter anc duas victorias.

audio
Nino Schurter avant la stagiun superlativa
03:24 min, Actualitad dals 08.05.2021.
laschar ir. Durada: 03:24 minutas.

E gugent gudagnass Nino Schurter anc in’ulteriura medaglia, sia quarta, als gieus olimpics da questa stad a Tokyo. Mo tut quai che suondi saja oz in supplement, di Schurter che na fa anc nagins patratgs da terminar sia carriera. El haja anc divers contracts fin il 2022. A partir dal 2023 saja pussibel ch’el midia lura forsa in zic il focus e sa concentreschia dapli sin cursas da maraton e cursas d’etappas sco per exempel il Cape Epic.

Legenda: Nino Schurter mira cun optimissem vers la stagiun olimpica. Keystone

Vital Albin per l’emprima giada cun l’elita

Suenter ils onns da success en la categoria d’U23 parta Vital Albin quest onn per l’emprima giada en la categoria d’elita, pia cun ils megliers dals megliers da la cuppa mundiala. Uschia po el er cumbatter l’emprima giada ad Albstadt cunter ses idol ed anteriur vischin da Tersnaus, Nino Schurter. Sco uffant haja el adina persequità questas cursas d’elita, e dad esser uss sez ina part da quella categoria saja simplamain grondius, di Vital Albin.

audio
Vital Albin avant sia emprima stagiun tar l'elita
03:59 min, Actualitad dals 08.05.2021.
laschar ir. Durada: 03:59 minutas.

Malgrà ses mo 22 onns fiss sia finamira da sa qualifitgar gia en ses emprim onn tar l’elita per il campiunadi d’Europa ed il campiunadi mundial. Ina gronda finamira, damai che la Svizra ha in’entira massa buns atlets che cumbattan per quels pèr plazs da partenza. Sper il sport studegia Vital Vital dapi bun in onn giurisprudenza, in studi ch’el fa davent da chasa.

Legenda: Vital Albin parta davent dad uss culs megliers dals megliers. Andreas Wieland

Andrin Beeli vul morder fin la davosa secunda

Il mountainbiker da Sagogn è partì cun sentiments maschadads vers Albstadt. Malgrà ch’Andrin Beeli ha pudì far in ulteriur pass enavant e la furma constat, n’èsi betg ì sco giavischà en sias emprimas cursas da la stagiun, quai er perquai ch’el haja fatg intgins sbagls individuals che n’avessan betg dastgà capitar, uschia il mountainbiker da 26 onns. Tranter auter haja el, gist tar l’emprima cursa dal Swiss Bike Cup a Leukerbad, sa decidì per il fallì material, per ils fallids pneus.

audio
Andrin Beeli – la flomma arda anc adina
03:58 min, Actualitad dals 08.05.2021.
laschar ir. Durada: 03:58 minutas.

Er sche la vita sco sportist professiunala saja diraglia, na cedia el betg. Il fieu per quest sport brischia anc adina ed el saja pront da dar tut, tant en il trenament sco er en mintga cursa. Gugent sa participass Andrin Beeli quest onn a la cursa da maraton dal campiunadi mundial l’entschatta october sin l’insla Elba en l’Italia.

Legenda: La devisa d'Andrin Beeli è da dar tut fin la davosa secunda. Andreas Wieland

Sper il trio cun Nino Schurter, Vital Albin ed Andrin Beeli va anc in quart Sursilvan, in quart Rumantsch a la partenza a l’emprima cursa da la cuppa mundiala ad Albstadt, numnadamain Ursin Spescha da Sevgein. Partenza per la cursa cross-country dals umens d’elita è la dumengia, ils 9 da matg, a las 14:35 uras. Gia a las 11:20 uras stat sin il program la cursa da las dunnas d’elita cun tranter auter Jolanda Neff e Sina Frei.

RTR actualitad 07:00

Artitgels legids il pli savens

Scrollar a sanestra Scrollar a dretga