- Lena Häcki-Gross intganta danovamain ad Antholz. En la partenza en massa sur 12,5 kilometers curra la dunna d'Engelberg cun be 1 sbagl ed il terz spert temp sin il 3. rang.
- Tar ils umens persvada Sebastian Stalder en l'ultima cursa da la cuppa mundiala avant il campiunadi mundial da biatlon cun rang 8.
Be dus dis suenter sia victoria en la cuppa mundiala ha Lena Häcki-Gross demonstrà ad Antholz danovamain sia furma briglianta. En la cursa cun partenza en massa sur 12,5 kilometers n'è ella bain betg stada senza sbagls al stan da sajettar, ella ha dentant be sajettar in tir dasperas.
Cumbinà cun sia ferma prestaziun da currer, il terz spert en il champ, ha quai tanschì a la Turitgaisa per il proxim resultat da glisch. Häcki-Gross è currida sin il 3. rang, mo las duas franzosas Julia Simon e Lou Jeanmonnot èn stadas anc meglras che la formala Svizra.
Era Baserga persvada
Duas emnas avant il campiunadi mundial è Häcki-Gross en la furma da sia vita, igl è stà en tut il 4. plaz da podest da sia carriera. Il punct culminant da la stagiun è suenter ina pausa da concurrenza dals 4 enfin ils 18 da favrer a Nove Mesto en Tschechia.
«Igl è stà brutal dir oz, jau hai anc ina giada stuì rimnar ensemen mia davosa energia», ha Häcki-Gross ditg per finir las cursas ad Antholz. «Ma i n’è betg da crair, jau ma sent uschè bain. Quai ma dat era in bun sentiment per il campiunadi mundial.»
Era las autras Svizras en partenza en massa han pudì persvader en il Tirol dal sid. Amy Baserga che ha dastgà esser a la partenza per l'emprima giada en la cursa da las 30 meglras atletas, e ch'è stada cun 23 onns la pli giuvna en il champ, ha gist mess in segn d'exclamaziun: Ella è sa classada cun in sbagl sin il 10avel rang ed ha uschia sutterrà ses meglier resultat singul da la carriera. Aita Gasparin ha medemamain persvadì cun in sbagl sco 18avla.
Stalder puspè en ils top diesch
Tar ils umens ha il sulet svizzer, Sebastian Stalder, danovamain persvas cun be in sbagl ed il rang 8. Igl è stà ses 4. top resultat en la 14avla cursa singula da l'enviern. Il Turitgais è stà a la partenza il sulet Svizzer damai che Niklas Hartweg è crudà ora ord motivs da sanadad.
A la testa ha Quentin Fillon Maillet dà ord ils mauns la victoria sin la davosa runda. Il Franzos è restà senza sbagls cuntrari als Norvegiais Vetle Christiansen (1 sbagl), Johannes Dale (2) e Vebjorn Sorum (1), ha dentant anc stuì sa laschar vargar da tuts trais sin la loipa ed è vegnì 4.
Ussa pon las biatletas ed ils biatlets far ina pausa fin ch'il campiunadi mundial cumenza en 2 emnas – en il cas da Häcki-Gross dastgass l'emprim anc vegnir festivà in pau.
