Il coronavirus è er in tema per la Cuppa Spengler. Sparta Prag duai quest onn esser da la partida al turnier da tradiziun. Tenor las novas disposiziuns da la Confederaziun sto dentant tgi che vegn da la Tschechia en Svizra ir per 10 dis en quarantina.
Tge capita, sch’il club tschec na vegn tuttina betg a Tavau? Tenor il president da la Cuppa Spengler, Marc Gianola, fissi teoreticamain pussibel da manar tras il turnier be cun tschintg equipas. Quai na fiss dentant betg l'emprima prioritad. Els sajan er vidlunder da tschertgar autras alternativas, sco el ha ditg envers il Schurnal regiunal da SRF. Marc Gianola sa fetschia quitads ch’i dettia in nov shutdown pervi da la situaziun actuala. Quai muntass: gieus davant tribunas vidas. L'onn passà è la Cuppa Spengler vegnida stritgada pervi da corona.
