Nagina medaglia per las Svizras. Ellas perdan cunter las Svedaisas cun 7:9. Per Melanie Barbezat, Esther Neuenschwander, Alina Pätz e lur skip Silvana Tirinzoni datti uschia mo in diplom olimpic. Per las campiunessas mundialas è quai ina trumpada. Cun quai sto la Svizra spetgar vinavant sin ina medaglia en il curling. L'ultima hai dà avant passa 16 onns, il 2006 a Torino.
Encunter la Svezia avevan las Svizras gia pers en la Round Robin. Quai era la suletta sconfitta en la prerunda per las Svizras. Il final da las dunnas ha lieu la dumengia tranter il Giapun e la Gronda Britannia.
Mezfinal
En il mezfinal aveva il team svizzer pers cunter la Giapunaisas – quai cun 8:6. La partida aveva cumenzà equilibrada. En il 5avel end han las Svizras però fatg in sbagl. Il segund crap dad Alina Pätz è ì memia lunsch. Las Giapunaisas avevan lura la schanza da far in takeout dubel e dad ir uschia cun 5:2 en avantatg.
(Bunamain) senza sconfitta en Round Robin
Las curlistas svizras han gudagnà la «Round Robin» als gieus olimpics a Peking. Las curlistas cun skip Silvana Tirinzoni eran gia qualifitgadas per il mezfinal suenter il sisavel gieu da glindesdi (cun 9:6 encunter ils Stadis Unids), cunquai che las emprimas quatter equipas da la Round Robin èn qualifitgadas.
