Sia gronda classa ha Emma Aicher mussà per l’emprima giada a la fin da la stagiun passada nua ch’ella ha gudagnà la cursa aval da Kvitfjell ed il super-G da Val Thuile en Italia. Ed era questa stagiun ha cumenzà cun in podest en il slalom da Levi per Emma Aicher. La giuvna skiunza da la Germania è in multitalent e sa esser sperta en las disciplinas tecnicas, dentant er en las disciplinas spertas.
A San Murezzan ha ella mussà a moda e maniera impressiunanta co ins chatta la meglra lingia sin la pista da la Corviglia. Senza grondas difficultads ed en ses stil tipic quiet, lom ha ella procurà per la meglra lingia, ed il meglier temp. Tar la cursa aval a San Murezzan lascha ella las iconas da quest sport, Lindsey Vonn e Sofia Goggia suenter ella.
Meglra Svizra: Jasmine Flury
Be in di suenter ses stupent comeback suenter ina pausa da stgars dus onns ha Jasmine Flury fatg surstar tar la segunda cursa aval a San Murezzan. Davent da l’entschatta era ella davantvart da la partida. A la fin ha ella be pers in zichel dapli che ina secunda sin Emma Aicher ed è vegnida 11avla. Quai na pudev’ins betg spetgar ed è in fitg bun resultat. Sin quel sa la champiunessa mundiala bajegiar si e far ils proxims pass en la cuppa mundiala da skis.
Prevista sin la segunda cursa aval a San Murezzan
Per l’emprima giada suenter set onns ha la skiunza americana Lindsay Vonn puspè ina giada gudagnà ina cursa da la cuppa mundiala da skis. A San Murezzan era ella la pli sperta da la cursa aval. En la vegliadetgna da 41 onns ha ella gudagnà en Engiadin'Ota sia 83avla cursa da la cuppa mundiala.
Gia avant l’emprima cursa aval da la stagiun avev’ins udì che la regina da las disciplinas spertas fiss en furma. Ch’ella vegnia dentant da mussar uschè ina ferma prestaziun sin la pista da la Corviglia ha tuttina fatg surstar. Grazia a la stupenta prestaziun durant l’emprima cursa aval a San Murezzan, tutga ella uss era tar las grondas favuritas per la segunda cursa sin la medema pista.
Otg skiunzas svizras èn er oz puspè da la partida
Las cursas da San Murezzan èn per l’equipa da skis svizra las cursas da chasa. Nagliur auter vegnan uschia blers fans a guardar las cursas da las skiunzas svizras sco a San Murezzan. En la tgina dal sport d’enviern han las Svizras era gia mussà fitg bunas prestaziuns. A San Murezzan è per exempel ida si la staila da Lara Gut Behrami, u lura ha la campiunessa mundiala da la cursa aval, Jasmine Flury gudagnà qua sia emprima cursa da la cuppa mundiala.
Questa giada na tutgan las skiunzas svizras dentant betg tar las favuritas. Jasmine Flury è gist turnada en la cuppa mundiala da skis. Lara Gut Behrami, Corinne Suter ed era Michelle Gisin èn feridas. La pli ferma da l’equipa svizra pudess esser er oz puspè la giuvna Vallesana Malorie Blanc che parta cun il numer 16. Jasmine Flury parta cun il numer 8 e Prisca Ming-Nufer cun il numer 21.