La ferida da Jasmine Flury vi dal schanugl è stada ina ferida cumplitgada. Ella è sa blessada vi dal meniscus. Formulà simpel ha ella rut giu ina part dal meniscus vi dal schanugl. Insatge ch'i na dat betg uschè savens. Uschia èsi per ella era stà difficil da dir quant temp ch'i dovra per puspè pudair ir cun ils skis.
Circa dus onns suenter sia ferida ed in lung temp da reconvalescenza è Jasmine Flury puspè stada a la partenza dad ina cursa da la cuppa mundiala. E la campiunessa mundiala da la cursa rapida ha mussà sin la pista da la Corviglia ina ferma cursa. Il rang ed il temp n’èn gnanc uschè impurtants. Impurtant è per la skiunza da Tavau Monstein dad insumma puspè ir a la partenza dad ina cursa da la cuppa mundiala.
Prevista sin cursas a San Murezzan
Las skiunzas da la cuppa mundiala èn puspè enavos a San Murezzan. Dapi blers onns è San Murezzan en il chalender da cursas da las dunnas. Adina il december cumbattan las meglras skiunzas dal mund en Engiadin'Ota per plazzas da podest.
Quest onn èn las cursas da San Murezzan il tun da partenza en la stagiun da las disciplinas spertas. Il program en Engiadin'Ota prevesa duas cursas aval il venderdi e la sonda. La dumengia spetga lura anc in super-G sin las skiunzas.
Nov skiunzas svizras èn a la partenza
Las cursas da San Murezzan èn per las skiunzas svizras las cursas da chasa. Uschia emprova il trenader Beat Tschuor da dar ad uschè bleras skiunzas svizras sco pussaivel ina partenza a San Murezzan. Per l’emprima cursa aval da la stagiun ha Beat Tschuor nominà gist nov skiunzas svizras.
Da return en la cuppa mundiala da skis è era Stephanie Jenal. Ella è turnada suenter ina pausa pervia dad ina ferida da 10 mais. Er ella s’allegra dad ir a San Murezzan a la partenza e dad empruvar da s’avischinar puspè a las meglras dal mund.