Jasmine Flury ha curunà sia carriera il favrer 2023 cun il titel il pli impurtant e prestiges dal sport da skis. A Méribel en Frantscha è ella daventada campiunessa mundiala da la cursa rapida.
-
Bild 1 von 2. Jasmine Flury, 2024 a Crans-Montana. Bildquelle: Keystone.
-
Bild 2 von 2. Jasmine Flury al Swiss Ski Day. Bildquelle: RTR.
Enstagl dad empruvar da defender quest titel il favrer da quest onn ha Jasmine Flury stuì operar il schanugl e dapi lura è ella sin la via enavos en il circus da skis. Senza ch’ella è sgulada, ha Jasmine Flury sa fatg mal vi dal schanugl. Sia diagnosa: la rotla è vegnida or dal schanugl.
Jau na schess la vardad, sche jau schess che tut è puspè en urden.
Davent da l’entschatta n'ha nagin propi pudì dir quant ditg ch’ella na vegn betg pli a pudair ir cun skis. Uschia ha la skiunza da Tavau prendì in'emna suenter l’autra. La stad è ella alura puspè viagiada en l'America dal Sid per trenar per la proxima stagiun. Quai è ì fitg bain. Uschia è Jasmine Flury da buna speranza da puspè pudair sa participar a las cursas da chasa mez december a San Murezzan.
Er Gino Caviezel cumbatta per il return en il circus da skis
Entant che Jasmine Flury vesa ina pussaivladad magari realistica dad ir a San Murezzan a la partenza da las cursas da chasa n'è il termin dal return da Gino Caviezel betg uschè cler. Gino Caviezel è sgulà durant il Super G da Bormio il december da l’onn passà.
-
Bild 1 von 2. Bormio, 2024. Bildquelle: Keystone.
-
Bild 2 von 2. Gino Caviezel al Swiss Ski Day. Bildquelle: RTR.
Il skiunz grischun è sa fatg mal vi dal schanugl uschè ferm ch’el ha stuì terminar la stagiun immediatamain. Il schaner suenter la greva ferida è el vegnì operà e dapi lura è Gino Caviezel sin la via enavos en il circus da skis.
Tgi che enconuscha mai e mes frar Mauro sa che nus essan ils ultims che cedan.
Cura ch’il skiunz da Lai vegn ad ir a la partenza dad ina cursa da la cuppa mundiala n'è anc betg cler. El sa sentia bain, dentant na sa el betg dir cura ch’el vegn ad esser enavos. Cler è gia uss che Caviezel vegn a manchentar la partenza da la nova stagiun da skis la fin dad october a Sölden en Austria. El piglia propi ina emna suenter l’autra e guarda in suenter l'auter.