Jasmine Flury ha scrit istorigia da skis per il Grischun avant dus onns a Méribel cun vegnir campiunessa mundiala en la cursa rapida. Ella è l'emprima skiunza grischuna cun ina medaglia d'aur ad ina cursa mundiala. Anc uschè gugent avess la skiunza da Tavau-Monstein defendì ses titel a Saalbach-Hinterglemm. Ma quests mundials vegnan per ella memia baud. La spezialista da speed stat pir dapi curt puspè sin ils skis lungs da cursa e po trenar. Sia blessura vid in schanugl, succedida prest avant in onn en la cursa a Crans Montana, e quai senza ch'ella è ruclada, è fitg cumplexa. Ils medis hajan magari svelt avertì ella, che la via enavos vegni a cuzzar bler pli ditg che tar ina ruptura dal liom cruschà.
Jau hai stuì avair ina motivaziun. E quai è stà la WM a Saalbach.
Propi pudair parter al campiunadi mundial a Saalbach-Hinterglemm ed empruvar da defender ses titel en la cursa roiala fiss stà fitg sportiv. Insanua en ses intern haja ella gì ina pitschna speranza. Ma ella saja era stada realistica, che sia speranza eri utopica. Ella saja anc betg là nua ch'ella vegli. La sanadad haja prioritad, ed ella na veglia betg ristgar insatge. Ses schanugl dettia en il tact. Era sch'i haja fatg mal da stuair star nà e communitgar ch'ella na possia betg esser da la partida. Sco Jasmine Flury di, na vegnia ella era betg a far part d'ina cursa da la cuppa mundiala en questa stagiun. Ses focus saja uss sin il proxim eveniment grond, ils gieus olimpics dal 2026 a Cortina.
Svizras e Svizzers èn en furma – gudognan guess 11 u 12 medaglias
