Omaduas han 17 onns e fan il gimnasi da sport a Tavau. Ellas han persvadì la davosa stagiun en il Swiss Cup. Minna Bont cun gudagnar il classament general e Lara Bianchi ha fatg il terz plaz. Plinavant han ellas era mussà ferms resultats en cursas da la FIS.
Lara Bianchi è adina puspè stada en las top 10 u sin il podest dals slaloms, slalom gigants e super-Gs. Minna Bont ha mussa prestaziuns constantas en ils slaloms da la FIS. Per omaduas èsi stà l'emprima stagiun en la terz auta categoria da skis – suenter la Cuppa mundiala e la Cuppa d'Europa.
Las giuvnas en il cader C
Lara Bianchi da Sursaissa e Minna Bont da Lantsch èn las giuvnas en il cader C, cun 17 onns. Cun far part da l'equipa da Swiss Ski vegnan bleras chaussas pli simplas, sco las duas giuvnas din. Ellas hajan uss numnadamain atgnas persunas da service, e blers custs vegnian surpigliads da la federaziun. Entras quai possian ellas metter il focus cumplainamain sin l'ir cun skis.
Cun esser en il gimnasi da sport è in'autra finamira natiralmain era da dumagnar la matura. La scola saja dentant fitg flexibla, cunquai ch'ellas manchian bler, oravant tut durant l'enviern cura che las cursas èn. Ins stoppia parter en las lavurs e savair cura ch'ins haja da prender suenter examens, din Lara Bianchi e Minna Bont.
Cursas da la Cuppa d'Europa
Bainprest, l'entschatta da december, han lieu plirs slaloms gigants en il Vallais – cursas da la Cuppa d'Europa. Las duas giuvnas da 17 onns na vulan dentant betg far a sa sezzas memia bler squitsch e simplamain cumenzar la stagiun. Cun la speranza ch'i giaja vinavant sco la davosa stagiun è ida a fin.