Suenter sia victoria en l’emprima cursa rapida da la gievgia ed il segund plaz dal venderdi en il super-G n'è il skiunz dal chantun Sutsilvania betg stà da franar en la cursa roiala, il classicher al Lauberhorn, questa giada sin la pista originala. Odermatt, partì cun il numer 8 ed uschia sco emprim dals top favurits, ha mess si in temp che n'è betg pli stà da batter.
Il podest da la cursa rapida al Lauberhorn:
- Marco Odermatt (SUI) 2:25,64
- Cyprien Sarrazin (FRA) +0,59 sec.
- Dominik Paris (ITA) +1,92 sec.
Il sulet ch'ha anc pudì tegnair almain in zic pitg a Marco Odermatt è Cyprien Sarrazin. Il Franzos ch'aveva triumfà a Bormio e ch'ha gudagnà il di avant il super-G a Wengen è partì gist suenter Odermatt ed ha enfin la fin pers sco segund bun sis dieschavels sin l'actual meglier skiunz dal mund ch'ha fatg la differenza principala en il Kernen-S ed en il Ziel-S. Sarrazin fuss staus igl emprem Franzos che vess triumfà al Lauberhorn dapi Henri Duvillard il 1970. Il terz, il Talian Dominik Paris, ha pers gia bunamain duas secundas.
Ina solida prestaziun ha er Niels Hintermann mussà. Il Turitgais è vegnì 8avel cun in retard da bunamain trais secundas. Betg cuntent è percunter Stefan Rogentin. Il skiunz da Lai ha passa trais secundas retard ed ha stuì sa cuntentar cun il 13avel plaz.
Ils resultats dals Svizzers:
8. Niels Hintermann +2,74 sec.
13. Stefan Rogentin +3,23 sec.
14. Franjo von Allmen +3,79 sec.
15. Josua Mettler +3,89 sec.
22. Alexis Monney +4,63 sec.
24. Lars Rösti +4,95 sec.
27. Gilles Roulin +5,13 sec.
Aleksander Aamodt Kilde sa tschenta en l'ospital
Crudà ora è Aleksander Aamodt Kilde. Il Norvegiais è crudà grevamain en il Ziel-S ed ha stuì vegnir transportà davent cun l'helicopter. Kilde n’è betg dal tut fit ed a la fin han mancà ad el las forzas. Gia en l’emprima cursa rapida era il svizzer Marco Kohler crudà ed en il super-G il Franzos Alexis Pinturault. Omadus han rut il liom cruschà uschia che la stagiun è a fin per il Svizzer ed il Franzos.
Er crudà ora al Lauberhorn è Justin Murisier, quai tar in sigl en la part sisum. Er el aveva ambiziuns da far questa giada il pass sin il podest. Murisier ha dentant gì cletg en il discletg ed è mitschà senza blessuras.
Il spectachel al Lauberhorn è garantì
La cursa rapida dal Lauberhorn vala sco in dals gronds classichers insumma en la cuppa mundiala da skis. Onn per onn carmala questa cursa millis da persunas a Wengen a l’ur da la pista, millis èn da l’auter maun a chasa davant la televisiun vi da tegnair ils poleschs. A la cursa rapida dal Lauberhorn vegn scrit onn per onn in ulteriur chapitel istorgia da skis, qua naschan ils stars, pli tard las legendas da skis.
