Cyprien Sarrazin che sa chatta en ina furma excellenta e ch'aveva gia gudagnà la fin december la cursa rapida da Bormio ha mussà ina cursa perfetga da la partenza fin l’arrivada. La finala ha el battì il grond favurit Marco Odermatt per bunamain sis dieschavels. Il Norvegiais Aleksander Aamodt Kilde, che n’è betg dal tut fit, ha sco terz pers gia ina secunda sin il Franzos. Per Odermatt èsi da reminent il 12avel podest en seria en la disciplina super-g. Cunquai realisescha el il record da l'Austriac Hermann Maier.
Il podest:
- Cyprien Sarrazin (FRA) 1:47,75
- Marco Odermatt (SUI) +0,58 sec.
- Aleksander Aamodt Kilde (NOR) +1,00 sec.
Manchentà be per pauc il podest ha il duo talian cun Dominik Paris sco quart e Guglielmo Bosca sco 5avel. A Paris han 6 tschientavels mancà sin il podest, a Bosca 16 tschientavels.
Stefan Rogentin sut ils top 10
Il Grischun Stefan Rogentin n’ha betg pudì repeter il success d’avant in onn cura ch’el era vegnì segund en il super-G da Wengen. Il skiunz da Lai ha pers 1,58 secundas sin Cyprien Sarrazin ed è vegnì 9avel. Anc in zic meglier èsi ì a Justin Murisier sco 7avel cun in retard da 1,38 secundas. L’auter Grischun, Gino Caviezel, ha suenter in grond sbagl sur il Silberhornsprung pers bler temp, bunamain quatter secundas, ed uschia manchentà in plaz sut ils top 30.
Ils resultats dals Svizzers sut ils top 30:
7. Justin Murisier +1,38 sec.
9. Stefan Rogentin +1,58 sec.
14. Anaud Boisset +2,20 sec.
17. Niels Hintermann +2,38 sec.
19. Loïc Meillard +2,54 sec.
22. Gilles Roulin +2,81 sec.
Alexis Pinturault sa blessà
Legria e tristezza en l’equipa franzosa. Durant che Cyprien Sarrazin ha gudagnà il super-G da Wengen ha Alexis Pinturault stuì vegnir transportà cun helicopter en l’ospital. Il rutinà skiunz da Courchevel è crudà sur il Silberhornsprung e sa blessà uschè ferm ch’el n’ha betg pudì bandunar sulet il lieu. Suenter la cursa da Pinturault è la cursa stada interrutta per in lung temp. Tge blessuras ch’il Franzos ha n’è anc betg enconuschent.
Gia en l’emprima cursa rapida era il Svizzer Marco Kohler crudà e sa blessà vid in schanugl. L’atlet dal cader B da Swiss Ski ha stgarpà il liom cruschà, il meniscus sco er stratg il liom intern.
La sonda stat sin il program a Wengen la legendara cursa rapida dal Lauberhorn. Partenza è a las 12:30 uras. La dumengia spetga anc il slalom.
