Vincent Kriechmayr gudogna l'ultima cursa rapida da la stagiun a Soldeu en l'Andorra. Per l'Austriac è quai gia la quarta victoria da questa stagiun. Segund e terz vegnan ils dus Tudestgs Romed Baumann ed Andreas Sander.
- Vincent Kriechmayr (AUT) 1:26,59
- Romed Baumann (GER) +0,09 secundas
- Andreas Sander (GER) +0,13 secundas
Marco Odermatt ha pers sur ina secunda sin Kriechmayr e vegn 15avel – ses pli nausch resultat da la stagiun cun excepziun da la cursa a Kitzbühl cura ch'el è sa blessà.
Odermatt dovra podests per il record
En la cursa per il record da 2000 puncts en ina stagiun fa el cun quai 18 puncts, 156 mancan uss anc. Per rumper il record duvra el ussa en il super-G ed il slalom gigant ina victoria ed almain in plaz 3 u dus segunds plazs.
Meglier Svizzer vegn Niels Hintermann sco 10avel. Er il Grischun Stefan Rogentin ha gì fadia cun la pista e vegn 22avel.
Ils Svizzers
- 10. Niels Hintermann +0,50 secundas
- 14. Marco Odermatt +1,01 secundas
- 22. Stefan Rogentin +2,00 secundas
La culla da cristal da la cursa aveva Aleksander Aamodt Kilde già segirà avant questa cursa cun ses victorias ha el dominà durant tut la stagiun.
