La Svizra è quest enviern la naziun cun il pli grond success en la cuppa mundiala da ski alpin. Ils atlets ed atletas svizras han ramassà 1 1'318 puncts. Sin plaz dus suonda cun gronda distanza l'Austria cun 8'729 puncts e sin il terz plaz la Norvegia cun 7'611 puncts.
Dominà la stagiun tar ils umens ha Marco Odermatt. Il Bernais gudogna la culla gronda e duas pitschnas e realisescha in record da puncts en il classament general da la cuppa mundiala cun passa 2'000 puncts. La stagiun da las dunnas ha l'Americana Mikaela Shiffrin dominà. Er ella gudogna la culla gronda cun passa 2'000 puncts e duas pitschnas.
Triumfs per la Svizra
- Classament general da la cuppa mundiala umens: Marco Odermatt (2042) ha repetì ses triumf da la stagiun precedenta. Ultra da quai ha el realisà in nov record, anc mai ha in um cuntanschì dapli che 2000 puncts.
- Super-G umens: tschintg victorias da set cursas mainan Marco Odermatt (740) en il super-G tar sia emprima culla da speed.
- Slalom gigant umens: sis da sias 11 victorias da la stagiun ha Marco Odermatt (840) cuntanschì en il slalom gigant ed uschia gudagnà la segunda giada en seria la culla pitschna en sia disciplina da parada.
- Super-G dunnas: Lara Gut-Behrami (413) gudogna l'ultim super-G da la stagiun a Soldeu e cun quai er per la quarta giada la culla pitschna da cristal.
Las cullas repartidas en l'ulteriur mund
- Classament general da la cuppa mundiala dunnas: Mikaela Shiffrin (2'206) ha segirà sia tschintgavla culla cun fin uss 13 victorias dal di. La persequitadra Lara Gut-Behrami vegn be sin la mesadad (1'217).
- Cursa rapida dunnas: Sofia Goggia (740) è – grazia a tschintg victorias en otg cursas – per la quarta giada la meglra en la disciplina la pli sperta.
- Slalom gigant dunnas: Mikaela Shiffrin (800) ha segirà sia segunda culla pitschna en il slalom gigant. Gut-Behrami cumbatta anc per il segund plaz.
- Slalom dunnas: cun sis victorias e trais giadas rang dus ha Mikaela Shiffrin (945) tschiffà sia setavla culla da slalom. Wendy Holdener (655) ha fatg il segund plaz.
- Cursa rapida umens: Aleksander Aamodt Kilde (760) stat sisum grazia a sis victoria. Las ulteriuras trais cursas ha gudagnà Vincent Kriechmayr.
- Slalom dals umens: Il Norvegiais Lucas Braathen (546) ha gì da tremblar enfin la davosa cursa nua ch'il segund plaz ha lura bastà.
