La culla da cristal en la disziplina da la cursa rapida va quest onn a l'austriaca Cornelia Hütter ch'ha gudagnà la davosa cursa rapida a Saalbach. Uschia manchenta la Svizra Lara Gut-Behrami sia quarta culla da cristal questa stagiun. Ella ha be cuntanschì il 17avel plaz.
La decisiun da la culla da cristal:
- 1. Cornelia Hütter (AUT) 397 puncts
- 2. Lara Gut-Behrami (SUI) 369
- 3. Sofia Goggia (ITA/blessada) 350
- 4. Stephanie Venier (AUT) 346
Cunquai che la taliana Sofia Goggia n'era betg da la partida pervia d'ina blessura, han be pli Lara Gut-Behrami, e las duas austriacas Cornelia Hütter e Stephanie Venier gì schanzas sin la culla da cristal da la cursa rapida. Ma cun il 17avel plaz da Gut-Behrami n'ha la Svizra gnanc pli pudì far puncts ed ha uschia il davos gì 28 puncts pli pauc che Cornelia Hütter.
Dentant era sch'i n'ha betg tanschì per la culla da disciplina en la cursa rapida, ha Lara Gut-Behrami tuttina gudagnà il classament general da la cuppa mundiala, uschia che la trumpada da la cursa rapida na tegn probabel betg uschè ditg.
Il podest da la cursa rapida a Saalbach:
- Cornelia Hütter (AUT) 1:45,08 min.
- Ilka Stuhec (SLO) +0,17 sec.
- Nicol Delago (ITA) +0,49 sec.
Las Svizras:
- 7. Michelle Gisin +0,75 sec.
- 15. Priska Nufer +1,67 sec.
- 17. Lara Gut-Behrami +1,89 sec.
