Las cursas da skis ad Adelboden èn legendaras e beneventan mintg'onn radund 35'000 aspectaturs sin il «Chuenisbergli». Spezialmain il slalom gigant da la sonda tutga tar ina da las pli spectacularas e grevas cursas da la cuppa mundiala.
Cumbat encunter las temperaturas
Gia dapi emnas cumbattan ils responsabels da las cursas encunter la mancanza da naiv e las temperaturas miaivlas. Il schef da pista Toni Hari è dentant persvas che las cursas pon vegnir realisadas la fin d'emna, malgrà las temperaturas autas. Spezialmain las notgs sin venderdi e sin sonda avessi da dar notgs serainas. Uschia van las temperaturas pli a bass, ed igl è lura er pli simpel da preparar la pista sin il «Chuenisbergli». Sche las temperaturas na van betg uschè a bass sco sperà, possian ins er anc preparar las pistas cun sal.
Toni Hari di ch'el fetschia quai ch'el possia influenzar. Actualmain munta quai: Quasi lavurar di e notg ed esser pront per tut las eventualitads. El è schont per la 27avla giada schef da pista ad Adelboden ed è persvas che las cursas pon vegnir realisadas quest onn.
