Siglir tar il cuntegn

Header

audio
Malgrà da l’aura in facit positiv
Or da RTR Audio dals 11.12.2023. Maletg: RTR
laschar ir. Durada: 45 Secundas.
cuntegn

Cursas da skis a San Murezzan Bilantscha per part positiva

A San Murezzan ha gì lieu la fin d’emna il tun da partenza en la stagiun da spertezza per las skiunzas da la cuppa mundiala. Quasi tut las cursas han pudì vegnir manadas tras, be il super-G da la dumengia è crudà en la naiv.

audio
Bilantscha da la fin d'emna a San Murezzan cun Robin Miozzari
ord Actualitad dals 09.12.2023. Maletg: RTR
laschar ir. Durada: 3 minutas 16 Secundas.

Cun brama han las skiunzas da la cuppa mundiala spetgà sin las cursas da spertezza a San Murezzan. Suenter che la Federaziun internaziunala da skis FIS ha stuì desdir las cursas rapidas a Zermatt, èn las cursas a San Murezzan stadas il tun da partenza en questa stagiun. Sin il program èn stads in super-G il venderdi, alura la disciplina roiala, ina cursa aval la sonda, ed anc ina giada in super-G la dumengia. Pervia da memia blera naiv e temperaturas autas ha quella cursa dentant stuì vegnir annullada.

Blera glieud la sonda

Suenter che la Svizra Lara Gut-Behrami aveva procurà il venderdi per l’emprima plazza da podest svizra tar las cursas da la cuppa mundiala a San Murezzan – èn ils fans dal sport da skis vegnids la sonda en massas sin la costa da la Corviglia. En l’arrivada a Salastrains, dentant era lung la pista ha in grond public persequità las cursas.

Quai fa sa chapescha plaschair. Sche las curriduras èn cuntentas cun la pista ed il public vegn en massas, lura èn tuts cuntents. Gist era perquai avess ins manà tras a San Murezzan fitg gugent era la terza cursa. Malavita è quella dentant crudada en l’aua. Pervia da la mancanza d’entradas tras quella desditga, han ins uss dad activar la segirada ch'egualisescha il donn finanzial tras l’aura.

RTR actualitad 17:00

Artitgels legids il pli savens