Il super-G da las dunnas che fiss stà planisà la dumengia a San Murezzan è vegnì ditg giu. La naiv intensiva da la notg passada na lubeschia betg da far la cursa che fiss stada la terza cursa da speed aifer trais dis, communitgeschan ils organisaturs.
En l’intervista cun RTR discurra il president dal comité d’organisaziun, Robin Miozzari, da motivs fitg spezials per la desditga. Ils gidanters hajan manà or da la pista la naiv nova da la notg passada – 20 fin 40 centimeters – ed uschia fiss il start stà pussibel. Ma pervi da las temperaturas chaudas e l'umiditad auta saja lura la basa da la pista rutta.
Il super-G da San Murezzan è gia la terza cursa da la cuppa mundiala da la dunnas che na po betg avair lieu. Gia il november eran las duas cursas rapidas da Zermatt crudadas en l’aua.
7avla annullaziun per ils umens
Era tar ils umens cuntinueschan las annullaziuns da las cursas. Il slalom che fiss stà la dumengia a Val d'Isère en Frantscha n’ha medemamin betg gì lieu. Pervia da la plievgia e la naiv saja la pista memia loma, hai gì num. Per ils umens èsi gia la settavla annullaziun questa stagiun.
