Siglir tar il cuntegn

Header

cuntegn

San Murezzan Jasmine Flury n’è anc betg dal tut cuntenta

Duas cursas, duas giadas betg tranter las meglras diesch. L’unica skiunza grischuna che parta tar las cursas da la cuppa mundiala da skis a San Murezzan n’è anc betg dal tut cuntenta cun las prestaziuns.

Per la skiunza grischuna Jasmine Flury da Tavau Monstein èn las cursas da la cuppa mundial da skis a San Murezzan las cursas preferidas. Quai na fa star stut. En Engiadina Auta ha la skiunza da trenta onns gudagnà l’onn 2017 sia emprima cursa da la cuppa mundiala e sin la pista da la Corviglia è ella vegnida la stagiun passada quarta da la cursa aval.

audio
Jasmine Flury anc betg dal tut cuntenta
ord Actualitad dals 09.12.2023. Maletg: RTR
laschar ir. Durada: 2 minutas 47 Secundas.

Emprims resultats na cuntentan anc betg

Il super-G da San Murezzan il venderdi era l’emprima cursa da spertezza da questa stagiun da skis da las dunnas. Ins sa che la grischuna Jasmine Flury è avant l’emprima cursa da la stagiun adina pli gnervusa che normalmain. Quai n'era tar il super-G betg auter.

Er tar la segunda cursa da la stagiun, la cursa aval, ha Jasmine Flury sentì il puls in zichel pli intensiv che tar autras cursas. Cler, las emprimas cursas da la nova stagiun èn impurtantas, ellas dattan l’emprima giada ina survista da la situaziun actuala. Ed alura èn quellas cursas perfin a chasa en il Grischun. Las cursas da San Murezzan èn per Jasmine Flury las cursas preferidas. Era perquai vul ins mussar bunas prestaziuns. Fin uss na è quai anc betg gartegià.

Proxima schanza tar la terza cursa, il super-G da dumengia

Anc n'ha Jasmine Flury anc betg chattà la lingia perfetga sin la pista da la Corviglia. Sin ils emprims dus resultats sa ella dentant bajegiar si. Dumengia spetga anc ina giada in super-G. Forsa alura è la grischuna pronta per ina plazza tranter las meglras diesch.

RTR Actualitad 17:00

Artitgels legids il pli savens