Il campiunadi mundial da skis dals juniors a St. Anton en l’Austria ha cumenzà optimal per la Svizra. Gist en l’emprima cursa hai dà l’emprima medaglia d'aur. L’Appenzellaisa Stefanie Grob ha gudagnà la cursa rapida, piz a cup avant la Taliana Vicky Bernardi (+0,03 secundas) e la Norvegiaisa Pernille Dyrstad Lydersen (+0,35 secundas). La giuvna skiunza da 18 onns che fa part al cader C da Swiss Ski valeva sco ina da las favuritas per il titel en questa disciplina da parada.
Stefanie Grob è suenter la campiunessa olimpica Corinne Suter (2014) e Juliana Suter (2019) la terza juniora svizra che daventa campiunessa mundiala en la cursa rapida ils davos 10 onns.
Bronz per ils juniors svizzers
La cursa rapida dals juniors ha gudagnà a moda suverana il Sloven Rok Aznoh. El è stà ina mesa secunda pli spert ch’il Franzos Alban Elezi Cannaferina. Cumplettà il podest sco terz ha il Svizzer Livio Hiltbrand (+0,82 secundas).
Il Bernais da 19 onns ha dentant er gì il cletg dals tschientavels da sia vart. Livio Hiltbrand è numnadamain stà be in sulet tschientavel pli spert che l’Austriac Vincent Wieser. Ils juniors austriacs ston uschia spetgar vinavant sin lur emprima medaglia a quest campiunadi mundial da chasa.
Silvano Gini da Champfèr hai stuì sa cuntentar cun il 23avel plaz. Il skiunz rumantsch ha pers 1,86 secundas sin il victur sloven. Dapli schanzas quinta Gini lura d’avair en sias disciplinas preferidas, il super-G ed il slalom gigant.
