Igl è stà ils 27 da schaner 1991 cura ch'il skiunz da Cuira ha gudagnà sia suletta medaglia ad in eveniment grond. En la cursa rapida als campiunadis mundials è Daniel Mahrer vegnì terz, davos il collega d'equipa Franz Heinzer ed il Talian Peter Runggaldier.
Sch'el guarda oz enavos sin questa cursa, sche descriva el questa medaglia da bronz sco segund grond success da sia carriera. Pli grond saja mo anc sia victoria sin la Streif a Kitzbühel il 1989 stada.
Cursa è anc adina preschenta
Malgrà ch'igl è gia 30 onns dapi ch'el ha gudagnà la medaglia da bronz a Saalbach è la cursa anc pulit preschenta tar l'um da 59 onns.
Suenter radund 40 secundas sun jau siglì memia dretg sur in crest. Senza quai sbagl fiss jau forsa anc stà pli davant en il classament.
En l'arrivada han 66 tschientavels mancà sin il victur e 41 tschientavels sin il segund. Daniel Mahrer sa regorda dentant anc bain ch'el saja stà cuntent cun la terza plazza, cunquai ch'el haja savì nua ch'el haja pers il temp.
Il spezialist da cursas spertas, che ha gudagnà otg cursas en la cuppa mundiala durant sia carriera, è adina stà in atlet ch'aveva gugent pistas taissas e da glatsch. U ditg auter: pistas grevas. Tuttina è el er vegnì bain a frida cun la pista a Saalbach, ch'era plitost ina cursa simpla. «Tuttina sche grev u lev, esser spert è dapertut fitg grev.»
La medaglia da bronz dals campiunadis mundials il 1991 ha oz ina plazza speziala en la stanza da buccals ed undraziuns da Daniel Mahrer. Ina medaglia che stat mo in zic en l'umbriva dal chamutsch d'aur da Kitzbühel.