Mattias Skjelmose ha gudagnà il Tour de Suisse 2023. Il Danais resta la finala nov secundas avant Juan Ayuso da la Spagna, il victur da la davosa etappa. La cursa cunter l'ura ha manà da Son Gagl ad Abtwil.
Setavla etappa
In di suenter la mort da Gino Mäder ha il Tour de Suisse cuntinuà. Las trais equipas Bahrain Victorious, il team da Gino Mäder, il team svizzer Tudor e la squadra belgia Intermarché han decidì da bandunar la cursa. Er ils ciclists svizzers Stefan Küng, Marc Hirschi, Michael Schär e Mauro Schmid han desistì da cuntinuar.
L'etappa da Tübach a Weinfelden ha gudagnà il campiun mundial Remco Evenepoel. Avant l'ultima etappa maina il Danais Mattias Skjelmose otg secundas avant l'Austriac Felix Gall.
Sisavla etappa
Pervia da la mort surprendenta da Gino Mäder, han ils organisaturs ditg giu la sisavla etappa da Cuira ad Oberwil-Lieli.
Ils velocipedists han fatg il venderdi ina «etappa da cordoli». Els èn ids ils davos 20 kilometers da l'etappa ad Oberwil-Lieli, senza ch'il temp vegnia mesirà.
Il team da Gino Mäder ha annunzià da sa retrair dal Tour de Suisse.
Tschintgavla etappa
Per la novavla giada ha il Tour de Suisse fatg fermativa a La Punt. Il ciclist spagnol Juan Ayuso ha gudagnà solo l’etappa roiala avant il nov leader Matthias Skjelmose dal Danemarc e Pello Bilbao er da la Spagna.
Quarta etappa
Felix Gall da l'Austria ha gudagnà la quarta etappa da Monthey a Leukerbad solo cun bun ina minuta avantatg sin il segund, il campiun mundial Remco Evenepoel. Per il Tirolais Felix Gall èsi la pli gronda victoria da sia carriera ed el è da nov er il leader dal classament general.
Terza etappa
La victoria dal di sco era il tricot mellen va al Danais Mattias Skjelmose. L'um da 22 onns ha finì ils 143,8 kilometers da Tafers a Villars-sur-Ollon trais secundas avant l'Austriac Felix Gall. Meglier Svizzer è Gino Mäder cun passa ina minuta retard.
Segunda etappa
Biniam Girmay da l'Eritrea ha gudognà a Nottwil la segunda etappa avant il Franzos Arnaud Démare ed il favurit Wout van Aert. Stefan Küng ha defendì il tricot mellen.
Emprima etappa
Stefan Küng ha gudagnà a Nossadunnaun/Einsiedeln l'emprima etappa dal Tour de Suisse – la cursa cunter l'ura sur 12,7 kilometers. Per el èsi la terza giada, suenter il 2018 ed il 2021 ch'el gudogna ina cursa cunter l'ura en il rom dal Tour de Suisse. Cun in retard da sis secundas è il campiun mundial – Remco Evenepul da la Belgia vegnì segund avant l'ulteriur favurit e Beltg Wout van Aert che ha in retard da 10 secundas. Cun Stefan Bisseger sin plaz nov e Joel Suter sin plaz 13, s'èn dus ulteriurs Svizzer plazzads en ils top 15.
