Gia per la novavla giada fa il Tour de Suisse fermativa a La Punt. L’etappa roiala sur 211 kilometers ha purtà ils ciclists da Fiesch en il Valais a La Punt en Engiadin'Ota. Ils organisaturs dal lieu d’etappa san co ch'ins organisescha uschia ina arrivada. Suenter l’etappa roiala han els pudì trair ina bilantscha positiva. Questa bilantscha positiva stat dentant in zichel en la sumbriva da dus grevs accidents. Sin la cursa a val dal Pass da l’Alvra èn il Svizzer Gino Mäder e l’American Magnus Sheffield crudads grevamain.
Mäder ha stuì vegnir reanimà, Sheffield cun bottas e squassada dal tscharvè
Cun tempos da tranteren passa 100 kilometers l’ura èn ils ciclists da la tschintgavla etappa dal Tour de Suisse sa mess sin viadi da l'ospizi dal Pass da l’Alvra vers La Punt. Sin questa cursa a val ha quai dà dus grevs accidents. Il Svizzer Gino Mäder è crudà uschè grev, ch’el ha stuì vegnir reanimà dal medi dal Tour de Suisse. Silsuenter è el vegnì transportà cun il helicopter en l’Ospital chantunal a Cuira. Magnus Sheffield ha subì diversas bottas ed ina squassada dal tscharvè.
Il venderdi e lura vegnì enconuschent che Gino Mäder è mort vid sias blessuras.
Victur Jose Ayuso e Mattias Skjelmose puspè en il Maillaut Jeaune
L’etappa roiala ha gudagnà il giuven talent spagnol Jose Ayuso. El ha fatg la differenza sin il Pass da l’Alvra ed è arrivà solo a La Punt. Mattias Skjelmose dal Danemarc è arrivà cun stgars ina minuta retard sin plazza dus. Skjelmose ha uschia puspè conquistà il «Maillaut Jeaune» il tricot dal leader dal Tour de Suisse.
