Fabian Moser ha en la 22avla minuta sajettà l'emprim gol per Cuira. Arosa ha pudì egualisar grazia a Alain Bahar en la 27avla minuta. L'uschenumnà «game-winning-goal» ha lura Mauro Frehner sajettà en la 34avla minuta per l'equipa da la chapitala.
Gieu fitg cumbattì
Davent da l'emprima minuta han ils radund 1400 aspectaturs vesì in gieu fitg guliv en il stadion da glatsch a Cuira. I ha da blers castitgs ed er las emoziuns èn stadas da vesair. En l'emprim terz hai perfin dà in cumbatt da pugn tranter plirs giugaders.
Sin gols han ils aspectaturs stuì spetgar fin en il segund terz. Fiss Cuira stà pli effizient al cumenzament dal segund terz avessen els gia savì decider il gieu en questa fasa.
En l'ultim terz ha l'equipa d'Arosa tschertgà pli savens l'offensiva. Cuira ha dentant defendì bain e n'ha betg laschar tiers bleras bunas schanzas al hosp. Sch'i è tuttina vegnì malsegir ha il goli da Cuira Marvin Kortin parà ils sajetts a moda fitg segira.
Igl è stà la segunda giada questa stagiun en la MySports League che Cuira ed Arosa han dà il duel da tradiziun. Gia l'emprim derbi la fin october ha l'equipa da la chapitala gudagnà. Quai ordaifer cun 3:1. En la tabella da la MySports League è Arosa da chattar da nov sin plazza 5 e Cuira sin plazza 9.
