A la fin da la stagiun 2022/2023 ha la skiunza grischuna Stephanie Jenal da Samignun mussà sia meglra prestaziun en la cuppa mundiala. A Kvitfjell en Norvegia aveva ella terminà il super-G sco dieschavla. Cler che la skiunza avess gugent mussà la stagiun suenter ina prestaziun sumeglianta u perfin anc ina meglra. Uschia n'èsi però betg vegnì.
Il cumenzament en la stagiun 2023/2024 è stà bun cun ina dudeschavla plazza ad Altenmarkt. Suenter dentant n'ha Stephanie Jenal betg pli pudì mussar uschè buns resultats. E la stagiun passada ha ella alura perfin stuì rumper giu anticipadamain pervia d'ina greva ferida.
Ferida en il trenament e suenter sin via enavos
Capitada è la ferida durant il davos trenament per la cursa aval da Garmisch Partenkirchen il schaner da quest onn. Stephanie Jenal era crudada ed aveva stgarpà il liom da la patella. Tenor ella è quai ina ferida bler pli cumplitgada che da stgarpar ils bindels cruschads.
Ils emprims mais suenter l’operaziun dal schanugl ha ella stuì star salda, pir suenter ha ella puspè pudì cumenzar cun il program da reabilitaziun. En quest process è Stephanie Jenal era anc 10 mais suenter l’accident. Ella na sa oz anc betg cura e nua ch’ella vegn a turnar en il circus da la cuppa mundiala da skis. Stephanie Jenal vegn a far il pass enavos pir cura ch’ella senta ch’ella è pronta per ina cursa da la cuppa mundiala.
