Siglir tar il cuntegn

Header

video
Vanessa Kasper fa vinavant
Or da Telesguard dals 14.05.2024.
laschar ir. Durada: 4 minutas 34 Secundas.
cuntegn

Skis La skiunza Vanessa Kasper fa vinavant

La skiunza engiadinaisa n'è betg pli part dal cader da Swiss Ski. Quai ha la Federaziun svizra da skis decidì questa primavaira. Tuttina vul la skiunza far vinavant.

La primavaira è adina il temp da la verdad per skiunzas e skiunzs. Lura decida numnadamain la Federaziun svizra da skis tgi che po restar en in cader da Swiss Ski e tgi betg. Questa primavaira han gist duas skiunzas e skiunzs rumantschs stuì prender cumià da Swiss Ski. Quai èn Sandro Simonet da Casti e Vanessa Kasper da Schlarigna.

audio
Vanessa Kasper vul vinavant ir cun skis
ord Actualitad dals 13.05.2024. Maletg: RTR
laschar ir. Durada: 3 minutas 53 Secundas.

 

L’emprim è crudà ensemen in pitschen mund

L’entira stagiun da skis n'è betg grategiada uschia sco quai che Vanessa Kasper avess gì gugent. Pervia d'ina operaziun è ella gia partida l’atun cun in retard da trenament en la stagiun. L’entschatta en la cuppa d’Europa era anc tut passabla. Suenter n'è la skiunza da 27 onns dentant mai propi vegnida en in ritmus. Per l’atleta engiadinaisa è però gist quai da gronda impurtanza. Ella ha gugent blers dis sin la naiv cun trenaments e bleras cursas ina suenter l’autra. Pervia da l’aura cun bleras desditgas e spustadas da cursas n'è quai betg stà pussaivel, uschia ch’ella n'è tut la stagiun mai propi vegnida sin ina frastga verda. Ils resultats n'eran alura er betg uschè buns. Pli ditg che la stagiun ha cuzzà e dapli squitsch cha Vanessa Kasper ha fatg a sasezza. Suenter ina stagiun nuncuntentaivla ha ella quasi fatg quint ch'i savess vegnir ora uschia. Il telefon dal trenader che ha ditg ad ella ch’ella na saja betg pli part dal cader era alura be pli la conferma da ses sentiment.

 

L’emprim il schoc, lura dentant nov curaschi

La communicaziun da Swiss Ski ha fatg mal l’emprim mument. Vanessa Kasper ha spons inqual larma suenter quest discurs. Spert ha ella dentant decis da far vinavant er senza status da cader tar Swiss Ski. Uss sto ella ir sia atgna via. Ella ha d'organisar tut da nov per pudair ir cun skis en il futur a moda professiunala. Per il mument è ella vi da metter ensemen sia equipa per la stagiun che vegn ed a la tschertga da sponsurs. Inqual sponsur ha signalisà da collavurar er en il futur cun ella. Autras chaussas ha Vanessa Kasper d'organisar dal tuttafatg da nov. Er sch’ella è per il mument trasora al telefon per organisar quai e tschai, la finamira è clera: L’atun vul ella star a la partenza da l’emprima cursa da la cuppa mundiala sin il glatscher da Sölden.

RTR Telesguard 17:40

Artitgels legids il pli savens