Vanessa Kasper da San Murezzan ha gudagnà il slalom gigant dals campiunadis svizzers da skis a Lai. Per la skiunza da 27 onns è quai l'emprima victoria a campiunadis svizzers. Kasper ha fatg il meglier temp en il segund percurs e quai ha bastì per la victoria. Si'emprima medaglia d'in campiunadi svizzer aveva Kasper gudagnà avant otg onns. Il 2016 era ella vegnida terza, era lura en il slalom gigant.
Segunda dal slalom gigant da quest onn è vegnida Stefanie Grob da Brülisau, terza la segunda Grischuna, Selina Egloff da Scuol.
Il segund percurs dal slalom gigant era vegnì spustà da mesemna sin gievgia. La raschun è stada l'aura trida da mesemna.
Era il slalom dals umens ch'avess gì d'avair lieu mesemna, era vegnì interrut pervia da l'aura. Cura che quel vegn prendì suenter n'è anc betg enconuschent.
