La davosa stagiun è stada per la skiunza Vanessa Kasper da Schlarigna ina per emblidar. Durant l’entir enviern n'è ella betg vegnida sin turas. La skiunza da 26 onns ha pudì ir nov giadas a la partenza ad ina cursa da la cuppa mundiala. Ella n'è stada dentant mai buna da sa qualifitgar per la segunda cursa, u ch’ella è crudada ora gia durant l’emprima cursa.
Durant l’entir enviern n'è Vanessa Kasper era betg vegnida a fin cun las cundiziuns, ch’eran alura fitg difficilas pervia da la pauca naiv. Tuttina ha la skiunza da l’Engiadina Ota pudì ramassar ulteriuras experientschas, experientschas che duain uss vegnir da bun ad ella. A la fin dad ina lunga stagiun ha la skiunza ultra da quai anc stuì far ina operaziun. Pervia da quella ha quai durà relativamain ditg fin ch’ella ha pudì turnar sin ils skis, uss è ella dentant pronta per la nova stagiun.
Scola da recruta, malsogna ed uss puspè fit
Entant che Vanessa Kasper s'ha stuì recrear durant questa stad dad ina operaziun dal meniscus, ha l’auter skiunz engiadinais che parta en la Cuppa d’Europa da skis stuì avair pazienza cun ina malsogna. Durant la scola da recruta a Magglingen è Silvano Gini da Champfèr vegni malsaun da la malsogna da Pfeiffer. L’emprim na saveva il skiunz da ventg in onns betg precis co vegnir a fin cun quella diagnosa, tut era nov per el, suenter divers mais da terapia è el uss dentant puspè fit.
Silvano Gini giaudia da pudair ir a la partenza da cursas da la cuppa d’Europa. Sco che el di e quai per il mument sia unica pussaivladad da sa mesirar cun ils megliers dal mund. Il start en la nova stagiun da la cuppa d’Europa da skis è a Zinal en il chantun Valais.
