Siglir tar il cuntegn

Header

cuntegn

EHC Arosa Il trenader resta ed è commuentà

L'emprima stagiun da Rolf Schrepfer sco trenader d'Arosa ha la pandemia interrut. Cuntinuar il cumenzà e manar «ses giuvens selvadis» en ils playoffs da la My Sports League è sia finamira. El avess era gì l'offerta da midar en ina liga pli auta.

Sia emprima stagiun sco treander da l'EHC Arosa aveva Rolf Schrepfer definitivamain s'imaginà auter. Be paucas partidas giugadas l'atun passà avant che la pandemia ha fatg fin a la stagiun, era en la pli auta liga d'amaturs. Cun il consentiment dal club da tradiziun ha Rolf Schrepfer gidà a la banda dal club dad Olten. Il club en la segund auta liga professiunala svizra ch'ha, sco la pli auta era, pudì dar il campiunadi. Olten avess gugent salvà el. Offerì il post da trenader assistent. Cura ch'ils giugaders da l'EHC Arosa han udì dals plans èn els s'engaschads tar la direcziun dal club per ch'il trenader restia. Ils giugaders desistan era d'ina part da lur paja. Rolf Schrepfer è stà pulit commuentà da questa acziun ch'è detg unica en la vita dad in trenader. El ha dà in chanaster ad Olten. El na sappia e na veglia betg laschar a mesa via «ses giuvens selvadis», sco Schrepfer numna sia truppa.

audio
Rolf Schrepfer resta a la banda d'Arosa
ord Actualitad dals 17.09.2021. Maletg: RTR
laschar ir. Durada: 2 minutas 54 Secundas.

Giuvna è sia equipa definitiv. En media la pli giuvna da tuttas en la terza auta liga dal hockey svizzer. Numerus han bandunà il club e blers giuvens èn vegnids vitiers. A quels manca l'experientscha. Gidar a cuntanscher quell'experientscha è la lavur dal trenader, ch'è en ses massa onns da profi vegnì trais giadas campiun svizzer da hockey. Era quai ha cutizzà Rolf Schrepfer da restar tar il club grischun da tradiziun. Tge ch'è pussaivel en la nova stagiun saja grev da dir. Sa qualifitgar per ils playoffs è l'emprima finamira. E suenter saja tut pussaivel.

RTR actualitad 11:00

Artitgels legids il pli savens