Per Dario Caduff è la stagiun 2021/2022 in zic ina stagiun da la vardad. Ils ultims onns ha el furmà ensemen cun ses bun collega Leon-Vincent Sarkis il tandem en gol tar il EHC Cuira. En ils gieus decisivs era Sarkis dentant il numer 1. Ses bun collega è uss davent. Da nov sa mesira Dario Caduff en gol cun dus giuvens da 20 e 21 onns. Cler è: Il goli sursilvan va sco numer 1 en la nova stagiun.
Cler, ils fans vulan vesair insatge sch'ins dastga surprender la responsabladad sco numer 1.
Dad ina vart sentia el il squitsch, da l'autra vart sa legra el dentant er sin la nova sfida. Dario Caduff vul mussar ch'el è in goli che vegn da manar il EHC Cuira en ils playoffs da la Mysports League, la terz'auta liga da hockey en Svizra.
Cun 26 onns gia in routinier
Il cader dal EHC Cuira è in cader fitg giuven, en media mo in zic sur 23 onns. Cun ses 26 onns è Dario Caduff il quart vegl en l'equipa.
- Andreas John (40 onns)
- Simon Scherrer (33 onns)
- Yannick Bucher (32 onns)
- Dario Caduff (26 onns)
Ils congiugaders duajan profitar da sia experientscha. El ha giugà a Rapperswil, Bülach, Arosa, Luzerna e dapi il 2018 a Cuira. Il goli è in dals giugaders rutinads e vul mussar quai durant questa stagiun. Uschia saja ina da sias finamiras er da surprender dapli responsabladad.
Jau vi esser in leader en l'equipa
In leader en in'equipa che ha gì ina greva preparaziun. 7 dals 8 gieus da test ha il EHC Cuira pers. La fin d'avust ha plinavant il trenader Tomas Tamfal bandunà il club. I spetga pia en mintga cas ina greva stagiun sin l'equipa da la chapitala grischuna. Per Dario Caduff èsi perquai cler ch'els sappian mo avair success sco ferm collectiv che sa tegna ensemen, en buns sco er en grevs temps.
