La dumengia passada è la stagiun ida a fin per il numer 2 dal hockey grischun, il EHC Chur. En ils quartfinals dals playoffs da la Swiss League han els pers la seria cun 2:4 cunter La Chaux-de-Fonds.
Sco il president Carmine Di Nardo di envers il schurnal regiunal dad SRF, saja la trumpada dentant gia in pau tschessada. «Igl è stà ina super stagiun ed jau sun fitg cuntent cun quai che nus avain cuntanschì questa stagiun». Munta concret: Plazza 5 en la qualificaziun. E lura pretais fitg bler da La Chaux-de-Fonds en ils quartfinals, in'equipa cun l'ambiziun da far il pass en la National League.
Sportivamain è il club cuntent cun la stagiun. Impressiunant: l’equipa ha cuntanschì quest resultat senza giugaders esters. Ina via che il EHC Cuira suonda consequentamain. Quai è plitost in’excepziun en la Swiss League, nua che blers clubs sa basan sin rinforzaments da l’exteriur. Tenor il president ha la squadra fatg anc in pass enavant cumpareglià cun l’onn passà. Da la vart sportiva ha Carmine Di Nardo pia pauc da reclamar.
Ils aspectaturs restan ina sfida
In tema permanent tar il EHC Cuira restan ils aspectaturs. Durant questa stagiun ha il club registrà en media 1190 persunas per gieu da chasa – in pau pli pauc che l’onn passà. Di Nardo explitgescha dentant ch’ins stoppia far la differenza tranter gieus durant l’emna e gieus la fin d’emna, nua che l’interess saja cleramain pli grond. La sfida sajan gieus il mardi saira. «Quests gieus èn fitg malattractivs per ils clubs en la Swiss League». Là vegnan er fitg paucs aspecaturs dals adversaris. En quest grau spetgass el era ina giada in sustegn da la federaziun da hockey. El avess era gia in'idea: laschar davent ils gieus il mardi, uschia che la qualificaziun en la Swiss League giess a fin circa il medem temp sco quella en la National League. Tut ils gieus vegnissen lura dads la fin d'emna, quai che muntass dapli entradas per ils clubs.
Cun laschar davent ils gieus il mardi pudessins auzar l'attractivitad da la liga.
Quai avess er in'influenza sin las finanzas. La situaziun finanziala resta numnadamein ina sfida en l’entira liga. Ils ultims onns èn plirs clubs sa retratgs da la Swiss League per raschuns finanzialas. Il SC Langenthal u il EHC Winterthur èn mo dus da plirs exempels.
Per l’EHC Cuira saja la situaziun finanziala actualmain stabila. Tuttina stoppia il club mintg’onn puspè chattar ils meds finanzials necessaris per garantir il manaschi. E quai saja in pensum da mamut, di il president.
In nov stadion sco finamira
Carmine Di Nardo è dapi l'avust 2023 a la testa dal club ed è er ina persuna che guarda gugent a lunga vista. Ina visiun per ils proxims onns è era in nov stadion. L’actuala halla, il stadion Thomas Domenig a la Obere Au, datescha da l’entschatta dals onns 80 e mussa inqual segn da vegliadetgna. Ina gronda renovaziun n'hai mai dà.
Il EHC Cuira vul in nov stadion. Nus essan era cun la citad vid lavurar vid ina soluziun.
La finamira stoppia esser da construir a la Obere Au in center da prestaziun cun in nov stadion. Lur saja er pussibel da far in ulteriur pass enavant per il EHC Cuira. Anc è quai dentant musica dal futur. Ina chaussa para dentant clera: lungurus na vegn quai betg a vegnir enturn il numer 2 dal hockey grischun.