EHC Cuira – Tge fan ins insumma durant la stad?
Durant ch'ins sa chatta en la Badi da l'Obere Au e giauda l'aura chauda e las temperaturas, vegn mo intgins meters dasperas trenà dir. L'emprima equipa da l'EHC Cuira sa prepara per la stagiun che vegn.
Il trenament da stad è vegnì repartì sin blocs da mintgamai trais fin quatter emnas. En in tal bloc vegn mess spezialmain in accent, e vi da quel vegni lura lavurà il pli intensiv. Suenter mintga bloc datti in'uschenumnada «emna da budget» – temp cura ch'ils giugaders na ston betg trenar a Cuira. Teoreticamain possian ins alura ir en vacanzas, ins stoppia dentant era trenar durant quest temp.
I dat cler chaussas che fan dapli plaschair ch'il trenament da stad. Nus empruvain dentant da trair tras quai, perquai ch'igl è fitg impurtant per l'enviern.
Il focus durant la stad è sin la forza e sin la cundiziun. I va per sa metter en furma per l'enviern e da bajegiar si musculs – quai ch'ins na po alura betg pli far durant la stagiun. Bler temp passentan ils giugaders damai en la stanza da forza, nua ch'i spetga in plan da trenament fitg pretensius.
Il cumenzament è in zic stentus, perquai ch'ins ha mintga di il barbagiat
En il trenament da stad n'èn ils giugaders dentant betg mo da chattar en la stanza da forza. Duas fin trais giadas l'emna van els era sin il glatsch. Tenor ils giugaders la part la pli bella dal trenament da stad. Trenà na vegn dentant anc betg il gieu – mabain piculezzas sco skills, pass e sajets.
Questa stad integreschan ils dus trenaders Reto e Jan von Arx dentant anc in auter aspect en il trenament: Ina giada l'emna vegnia in expert a Cuira per far in uschenumnà « trenament da brainspeed» cun ils giugaders. I vala tranter auter da cumbinar meglier il tscharvè cun la musculatura.
Saja quai percepziun sin il glatsch, vesair a moda perifera, tacs da respirar u tensiun en il corp. Tut nov per nus trenaders, nus pensain dentant che nus pudain profitar ina massa en quest sectur.
Actualmain
Jan e Reto von Arx stattan actualmain a la banda da l'EHC Cuira dapi il 2021. Ils dus frars treneschan l'emprima equipa e quai cun success. Durant la stagiun 2023/24 han els segirà il pass en la Swiss League.
En l'emprima stagiun en la Swiss League han ils dus frars pudì posiziunar bain la squadra. Ils playoffs na cuntanschan els bain betg – a la fin è l'EHC Cuira sa tschentà sin il 6avel plaz.
Carriera sin il glatsch
Ils dus frars han sezs era dà hockey. Entant che Jan von Arx ha giugà durant 20 onns tar il Club da hockey da Tavau, ha ses frar Reto er empruvà sia schanza en la NHL. El è l'emprim hockeyan svizzer che ha sajettà in gol en la NHL. Reto von Arx è dentant suenter be curt temp turnà enavos en Svizra. Là ha el lura giugà ensemen cun ses frar fin ch'els dus èn sa retratgs dal sport professiunal il 2015.
Carriera sper il glatsch
Per radund in onn è Reto von Arx stà da la vart dal nov trenader da l'equipa naziunala Patrick Fischer. El è dentant vegnì sclaus dal stab da trenaders, ma è restà tar la federaziun svizra ed ha trenà la selecziun U17 e l'equipa naziunala U18 ed U20.
Ses frar è stà fidaivel a ses club ed ha trenà durant tschintg onns la nova generaziun dal Club da hockey da Tavau. Dapi bunamain quatter onns stattan els dus uss a la banda tar l'EHC Cuira.
En general saja il trenament da stad sa sviluppà fitg ils ultims onns, manegian ils dus frars. Pli baud trenavan ins surtut las chommas ed il corp sura durant la stad. Ozendi sa concentreschan ins sin l'atletica dals giugaders, ed ils exercizis n'èn betg pli uschè monotons.
Nus n'eran da lez temp era betg quels che faschevan il pli gugent il trenament da stad. Nus avain era mo fatg quai, perquai che nus savevan ch'igl è impurtant.
I saja dentant essenzial ch'ins giaja cun il temp, manegian ils dus frars. La proxima stagiun veglian ins sa mussar ferm e plain energia. Ussa durant il trenament da stad mettian ins il fundament per ina tala stagiun.
HC Tavau – Co treneschan giugaders blessads durant la stad?
En in dals emprims gieus da playoff da la stagiun passada èsi capità. In check e per il defensur dal HCD Davyd Barandun è la stagiun stada a fin. El ha stgarpà ina tarschola en la coissa, e quai ha pretendì in'operaziun.
L'Engiadinais da 25 onns ha giugà l'emprim tar l'EHC San Murezzan. L'onn 2014 ha el lura midà en la squadra giuvna dal HCD. Ella stagiun 2017/18 ha il trenader Arno del Curto procurà per las emprimas minutas per Barandun en la National League. Dapi lura gioga l'attatgader per l'emprima equipa dal HCD, e vala sco giugader impurtant per la squadra.
En in dals emprims gieus da playoff da la stagiun passada sa blessescha l'Engiadinais dentant, ed ha stuì vegnir operà. Ussa è el sin via enavos sin il glatsch. Il trenament da stad è in pass impurtant.
Tar il HCD è il trenament en general fitg individualisà. Mintga giugader ha in agen plan da trenament nua ch'ils puncts centrals èn definids. Quai na munta dentant betg che mintgin trenescha per sasez. Ins emprovia da realisar ils plans da trenament uschia ch'ils giugaders possian trenar pli u main ensemen, declera il coach d'atletica Sergio Gaggioni. El ha l'incumbensa da far fit ils giugaders sur stad, per che quels sajan pronts il mument che la stagiun cumenza il settember.
In giugader blessà na pon ins betg duvrar sin il glatsch. Perquai emprovan ins durant la stad da trenar ils giugaders fits uschia, ch'els na sa blesseschan betg uschè svelt durant la stagiun. Il svilup dals musculs e la movibladad contribueschan a moda decisiva tar quai.
90% dal trenament durant la stad ha da far cun la prevenziun da blessuras. In atlet musculus u fit na vegn betg blessà uschè svelt.
Ed entant ch'ils giugaders sauns han mintga di novas finamiras da trenament, è quai tar ils blessads in zic auter. Er els èn vi dal trenar, ma els ston observar exactamain las prescripziuns da trenament dals medis e dals fisioterapeuts.
La progressiun è il pli impurtant tar ils giugaders blessads. Ins sto trenar pass per pass, per ch'il corp s'endisa puspè vi da la pretensiun.
Las instrucziuns survegn Barandun actualmain da differentas persunas. A l'entschatta haja il medi gì ina massa da dir, ussa haja in trenader extern ed il fisioterapeut surpiglià per gronda part l'incumbensa. Davyd Barandun planisescha ch'el possia puspè giugar enfin l'entschatta da la stagiun, il settember. El sa sentia plaunsieu puspè fit. 80 pertschient dal stan d'avant sa blessar haja el puspè cuntanschì. Ussa giaja quai anc per ils ultims pertschients, enfin ch'el saja puspè da vesair sin il glatsch.
EHC Arosa – co sa preparar durant la stad sin la Swiss League?
Er ad Arosa vegni trenà durant la stad, era sch'i manca anc blers giugaders. Per il club da hockey che ha anc giugà la stagiun passada en la pli auta liga d'amaturs – èsi difficil da dumagnar ensemen durant la stad tut ils giugaders. Perquai cumenza il dretg trenament pir mez fanadur. Fin lura pon ils giugaders ir glindesdi e mardi saira ensemen sin il glatsch. Intgins lavuran ad Arosa, per quels n'èsi nagin problem, i ha dentant schizunt in u l'auter da la Bassa.
Var diesch giugaders han bandunà il club dapi la stagiun passada, tranter quels era rutiniers sco il chapitani Reto Amstutz. Per egualisar questas perditas ha il club fatg contracts cun novs giugaders giuvens.
Blers giugaders novs è segir ina sfida, ma jau ves quai era sco ina schanza.
Il trenament da stad funcziuna ad Arosa anc medem sco l'onn passà. I na vegn trenà nagut auter – persuenter vegn trenà pli intensiv. A l'EHC Arosa saja bain conscient che l'emprima stagiun na vegn betg ad esser simpla. Ils giugaders ed il trenader sa legran dentant gia fitg sin ils emprims gieus. La finamira per la proxima stagiun saja tenor Rolf Schrepfer clera. Ins veglia vegnir en ils playoffs.
Sche nus na vulessan betg ils playoffs, na stuessan nus insumma betg giugar.