A partir dals 4 d'october vegnan ils frars a surpigliar il post sco scheftrenaders tar il club. Reto von Arx vegn ad esser responsabel per l'offenisva dal EHC, Jan von Arx per la defensiva. En lur carriera sco giugaders tar il HCD han ils frars gudagnà 6 giada il campiunadi svizzer. Suenter ch'els han terminà lur carriera il 2015 han omadus fatg emprims pass sco trenaders. Reto è stà co-trenader tar la naziunala da Patrick Fischer e ha tranter auter er trenà ils juniors svizzers. Jan è stà trenader tar la U-17 dal HCD.
Successurs per Tamfal
Be paucas emnas avant l'entschatta dal campiunadi aveva il trenader Tomas Tamfal bandunà per immediat il club. L'argumentaziun: la chemia tranter trenader e giugaders na constettia betg pli. Il Tschec aveva trenà il club durant 2 onns. Durant sia emprima stagiun aveva el manà ils da Cuira en la MySportsLeague – la terz'auta liga da hockey en Svizra.
Ad interim aveva Björn Gerhard surpiglià ses post. Ensemen cun il schef da sport Roger Lüdi vegn el anc ad esser responsabel per ils proxims dus gieus da chasa dal EHC. Ils responsabels dal club èn persvas ch'els han chattà ina buna schliaziun cun ils frar von Arx. Il club sa legria da beneventar els a Cuira.