RTR: Fabrizio Cavegn, dapi l’emprim d’avust in Bristol Rover. Tge è quai per in sentiment?
Fabrizio Cavegn: Quai è in mument fitg spezial da pudair ir en l’exteriur ed uss era gist en l’Engalterra, quai è per mai adina stà in siemi. Quai che marscha qua puncto ballape, fans ed infrastructura è simplamain grondius. Qua na pon ins betg s’imaginar en Svizra. Quella schanza vai jau stuì prender.
Sch’ins vul emprender d’enconuscher in pau quel club dals Bristol Rovers: Tge è quai per in club, cumpareglià cun il FC Vaduz?
Igl è in club da tradiziun, quai hai jau badà immediat. I han uschè blers fans. Cura che jau hai suttascrit ed igl ê vegnì communitgà uffizialmain, han uschè bleras persunas scrit e giavischà bun cletg e ch’i sajan cuntents che jau sun qua e ch’i stettian davos mai, dependa betg tge che capita. Sco ballapedist è quai in siemi. Quai dat immensa forza e motivaziun da cumenzar a far gols per els.
L’entira stad èsi vegnì speculà in pau nua che Fabrizio Cavegn vegn a midar. Co ès lura vegnì tar ils Bristol Rovers?
Tar ils Rovers han ils schefs vesì mai. Lura han els guardà divers gieus e guardà il gieus passads ed ils highlights. Lura han els spert piglià si contact e ditg ch’els lessan «quel giugader». E sch’i dattan quel sentiment a tai, lura ston ins dir – er a chasa – ch’ins sto pigliar quella schanza. E la motivaziun era lura er qua da dar en l’Engalterra, nua ch’i dat fitg fitg grondas schanzas da dar sin in nivel pli aut e far in bun pass vinavant.
Era la vart finanziala era stada in dals motivs per far il pass sin l’insla?
Davart quai na less jau uss exnum betg discurrer. Ma cura ch’ins ha la schanza da dar ballape en l’exteriur e vul far quel pass, lura ston stimar tut las finamiras, saja quai finanzialmain, cun abitar ed er cun sa sentir a chasa.
Midar davent da la segunda liga Svizra en la quarta liga englaisa: Hai qua er dà vuschs criticas?
Na, quellas n’ha jau betg udì ed era nagin ch’ha dumandà. Qua en l’Engalterra datti tut in auter radar. Sch’ins vegn a dar ses gieus e sch’ins vegn a far ses gols, èn ins en in auter radar. Ins vegn contemplà tut auter ch’en Svizra. Qua sun jau in nov giugader, betg in «ord la Challenge League».
Quai na pon ins betg cumparegliar. Qua vegn er giugà in auter stil da ballape.
Has nagina tema dad ir en emblidanza en Svizra sch’i na funcziuna betg sco giavischà a Bristol?
En Svizra hai jau in pau in num ed era da la vart da Vaduz hai gì num che jau sappia adina puspè turnar e ch’i saja averts per mai. Quai ston ins er schezzegiar fitg.
Vulain discurrer da l'euforia englaisa per il ballape e dain perquai in sguard sin la sonda passada: Là è il giugader cun il numer 29, Fabrizio Cavegn, vegnì beneventà en il stadion a moda frenetica cun 9’200 fans.
Fabrizio Cavegn sa presenta per l'emprima giada als fans
Tge è quai stà per in sentiment?
Gie, quai è stà in mument fitg fitg spezial che jau na vegn mai ad emblidar. Quai ha fat fitg pel giaglina. Jau hai gì il sentiment sco sche jau avess gia mussà en l’Engalterra tut quai che jau sai e sco sch’els enconuschessan a mai gia sur onns.
Quai è insatge fitg spezial – e per dir uschia: mega mega gail!
Lura han er in pèr scrit a mai ch’i sajan vid scriver ina chanzun per cura che jau fatsch in gol. Las organisaziuns da fans han er scrit ch’i vegnan a chantar per mai. Jau na poss betg spetgar da giugar per els e da far gols.
L'intervista cun Fabrizio Cavegn ha fatg Gian Carlo Candinas.