Proxima fermada: Engalterra - Fabrizio Cavegn mida da Vaduz tar ils Bristol Rovers

Suenter dus onns tar il FC Vaduz mida Fabrizio Cavegn tar il Bristol Rovers FC en la «League Two», quai ch'è la quart auta liga englaisa, quai scriva il FC Vaduz en ina communicaziun. Uschia mida l'attatgader da Vella tar in club da tradiziun englais, ch'è vegnì fundà il 1883. La mesemna aveva il ballapedist da 22 onns absolvì il check medicinal ed ussa suttascrit in contract da trais onns. Davart las modalitads da transfer èn ils dus clubs sa cunvegnida da betg discurrer.

Ils ultims onns è Fabrizio Cavegn s'etablì en la Challenge League sco capo-sajettagols da Vaduz. En totalmain 86 gieus per il club dal Liechtenstein ha el sajettà 37 gols e dà 9 assists.

Fabrizio Cavegn è actualmain l'unic giugader da ballape rumantsch che sa po numnar profi da ballape. Ils ultims mais hai dà inqual fama davart il giugader offensiv. Cun sias prestaziuns è el stà en ils blocs da notizias da clubs en Svizra ed er da l'exteriur. L'avrigl avevan gia pliras medias rapportà che la «mesa Super League» haja interess vid Fabrizio Cavegn.

Ch'il Lumnezian da 22 onns mida uss tar ils Bristol Rovers dastgan ins segir valitar sco surpraisa. Famas avevi dà las ultimas emnas spezialmain enturn clubs svizzers che hajan interess. Fabrizio Cavegn vegn uschia ad esser il sulet giugader svizzer da l'entira liga. Impurtant da savair è ch'er la quarta liga englaisa è ina liga da profis. Areguard quai sa differenziescha l'Engalterra da blers auters pajais.

En la «League Two» dastga l'attatgader a Vella sa legrar d'ina liga fitg cumpetitiva ed intensiva cun 24 equipas. Igl è ina liga ch'è enconuschenta per ballape fitg dir e passiunà. Uschia spetgan Fabrizio Cavegn 46 gieus da campiunadi. Cumpareglià cun Vaduz e la Challenge League po el er quintar cun bler dapli aspectaturs ed aspectaturas als gieus. Ils Bristol Rovers han ils ultims onns adina dastgà beneventar en media tranter 7'500 e 9'000 fans tar ils gieus da chasa. Il FC Vaduz ha, per exempel, gì la stagiun passada, en media 1'300 aspectaturs per gieu.

Cler è che questa midada porta er in tschert ristg. La quarta liga englaisa n'è betg uschè visibla e preschenta en Svizra, ed en il cas ch'i na va betg sco giavischà tar ils Rovers pudess la carriera da Fabrizio Cavegn vegnir franada ed esser cumbinada cun inqual sfida. Impurtant è lura che l'attatgader na va betg en emblidanza.

Cuntrari è questa midada er ina schanza: Sajetta il Lumnezian er sin l'insla ses gols è el fitg spert er sin il radar da las equipas pli autas en l'Engalterra.

Tgi èn ils Bristol Rovers?

Ils Bristol Rovers è in club da tradiziun – fundà il 1883 en la citad Bristol en l’Engalterra che gioga actualmain en la League Two, la quart'aua liga englaisa. Ils Rovers, cun il surnum «The Pirates», han ina gronda basa da fans e dattan lur gieus a chasa en il Memorial Stadium. In stadion vegl sco ins chatta savens en l'Engalterra cun ina capacitad da radund 12'000 persunas. L’istorgia dal club è marcada d'ina gronda loialitad dals fans e da rivalitads intensivas, spezialmain cun Bristol City, il rival da citad.

«The Pirates»

Avrir la box Serrar la box

La raschun ch'ils Bristol Rovers vegnan era numnads ils «Pirates» ha da far cun l'istorgia maritima da la citad da Bristol.

Da blers fans ha il club dentant er il surnum «The Gas», quai che deriva d'in vegl implant da gas che era da chattar gist sper l'anteriur stadion dal club, l'Eastville Stadium.

Gronds titels n'ha il club dal sidvest da la terra betg festivà en sia lunga istorgia. En la Premier League han els mai dà. L'auta liga ch'ils Bristol Rovers han dà è stada la segund auta liga englaisa. La gronda part da sia istorgia è dentant la terz e quarta auta liga stada il da chasa da l'equipa.

Ina trumpada hai dà l'onn passà. Ils «Pirates» èn suenter trais onns puspè vegnids relegads da la terza en la quarta liga.