La stad 2021 ha Fabrizio Cavegn midà da Cuira 97 tar l’equipa U21 dal FC Son Gagl. Suenter dus onns mida el mondura, e cumenza la stad che vegn la nova stagiun cun il FC Vaduz en la Challenge League.
Ina carriera pass per pass
Ils davos dus onns ha Fabrizio Cavegn en emprima lingia dà cun ils giuvens sut 21 onns da Son Gagl. Per quella equipa ha l’attatgader da 20 onns marcà en 46 gieus betg main che 37 gols. Questa stagiun ha il giugader da Vella tutgà 17 giadas en 20 gieus per l'equipa che dat en la Promotion League (terz'auta liga). Vitiers hai tanschì per ir quatter giadas cun l’emprima equipa da Son Gagl sin il plaz, per curts temps da gieu. Ed en la Cuppa svizra ha Fabrizio Cavegn sajettà ses emprim gol sin livel da profi.
Il Telesguard ha rapportà il december 2021:
Il FC Vaduz ha dà al giuven Grischun in contract da dus onns, fin ils 30 da zercladur 2025 – sco il club dal Principadi da Liechtenstein communitgescha. Tenor il schef da sport da Vaduz, Franz Burgmeier hajan els schon persequità dapi daditg la carriera da Fabrizio Cavegn.
Nus essan persvas che nus vegnin ad avair bler plaschair cun el en il futur. El è in giugader spert cun in bun nas da far gols e cun ina super mentalitad.
Tar Vaduz vegn Fabrizio Cavegn segir ad avair meglras schanzas da giugar ina pli gronda rolla en l'emprima equipa che quai ch'i era il cas tar il FC Son Gagl. E cun Gion Fadri Chande da Tusaun ch'è actualmain segund goli, vegn il Lumnezian ad avair in ulteriur Grischun sco collega d'equipa.
