Siglir tar il cuntegn

Header

video
Finamira profi – Fabrizio Cavegn ha fitgà pe a Son Gagl
Or da Telesguard dals 01.12.2021.
laschar ir
cuntegn

Finamira profi Fabrizio Cavegn ha fitgà pe a Son Gagl

Dapi la stad è Fabrizio Cavegn (19) part dal club da ballape da Son Gagl. En sia emprima stagiun tar la U21 dal club ha il Lumnezian sajettà en 14 gieus 8 gols. El è topscorer da sia equipa.

Il giuven Lumnezian è il giugader cun il numer 23 tar la U21 da Son Gagl che dat en 1. liga. E cun sia emprima mesa stagiun tar il club saja el cuntent. I saja segir er stà il dretg pass da far la midada da Cuira 97 tar Son Gagl. En in'equipa giuvna ha el qua la pussaivladad da vegnir pli datiers a sia finamira. L'entschatta november ha el perfin pudì dar in gieu amicabel cun l'emprima equipa, pia cun l'equipa da la Super League cul trenader Peter Zeidler.

Quest gieu è segir stà il numer 1 quest atun. Quai è gea mia finamira da dar ballape in di cun els.
Autur: Fabrizio Cavegn attatgader U21 Son Gagl

Cun ses emprims quatter mais a Son Gagl è el uschia era cuntent. Cler i pudessia adina anc ir meglier. Uschia menziuna il giuven da 19 onns ch'el avess gì schanzas da far anc dapli gols ch'ils 8 ch'el ha sajettà en ils 14 gieus da campiunadi.

Dapi la stad metta Fabrizio Cavegn quasi tut sin sia finamira da vegnir profi. Cun sia equipa da la U21 trenescha el sis fin set giadas per emna. Dasperas lavura el actualmain anc 30% tar il club. Saja quai sco pedel en il stadion u era en il fanshop dal club. Ma la gronda finamira è da pudair viver in di dal dar ballape.

Trenader cuntent cun el

Ses trenader tar Son Gagl è actualmain l'anteriur profi, Marco Hämmerli. El saja in trenader fitg communicativ ed empatic, di Fabrizio Cavegn. Il trenader è er cuntent cun ses attatgader cun il numer 23.

Nus essan fitg leds ch'el è tar nus e sa legrain sin il proxim temp cun el.
Autur: Marco Hämmerli trenader U21 Son Gagl
video
Trenader da l'U21 Son Gagl davart Fabrizio Cavegn
Or da RTR dals 01.12.2021.
laschar ir

Ils 8 gols che Fabrizio Cavegn ha sajettà durant ils gieus da campiunadi sajan ina vart da la medaglia. Er uschiglio saja il Lumnezian in giugader fitg engraziaivel. Il Fabrizio saja in giugader omnipreschent, alert e veglia adina vegnir meglier. Marco Hämmerli di ch'els sajan fitg cuntents cun ses svilup.

Vinavant cun gieus da campiunadi vai per la U21 da Son Gagl il mars proxim. Lura vul l'attatgader cun il numer 23 far ils proxims pass direcziun sia gronda finamira.

audio
Ballape: Fabrizio Cavegn ha fitgà pe a Son Gagl
02:35 min, Actualitad dals 01.12.2021.
laschar ir. Durada: 02:35 minutas.

RTR Telesguard 17:40

Artitgels legids il pli savens

Scrollar a sanestra Scrollar a dretga